Detaje të tjera janë zbardhur rreth atentatit të djeshëm në Fushë-Krujë, ku u ekzekutuan shtetasit Brilant Martinaj, Diklen Vata dhe Besmir Hoxhaj.
Sipas “BallkanWeb”, burime nga grupi hetimor kanë bërë me dije se përveç 10 personave të shoqëruar nga policia, ka dhe të tjerë kryesisht me precedentë të mëparshëm penalë që kanë njohje apo lidhje me Brilant Martinajn, Diklen Vatën dhe Besmir Hoxhajn.
Këta persona janë marrë në pyetje për të zbuluar lëvizjet e fundit të tre viktimave.
Mësohet se në vendngjarje janë gjetur rreth 54 gëzhoja armësh dhe sipas informatave nga burimet e policisë rreth viktimave është qëlluar me rreth 90 plumba.
Automjeti i viktimave po i nënshtrohet ende mbikëqyrjes, pasi dyshohet se dhe tre viktimat kanë pasur armë me vete. Ka dyshime se Diklen Vata ka dalë nga automjeti për t’u vetëmbrojtur, pasi dyshohet se kishte statusin e truprojës së Brilant Martinajt.
Tre viktimat ishin në Rinas dhe po lëviznin me automjetin e tyre drejt Fushë-Krujës, ndërkohë që autorët i kanë ndjekur me një automjet të ngjashëm. Autorët prej ditësh survejonin Martinajn dhe më pas iu kanë dalë para dhe iu kanë zënë pritë duke i qëlluar me armë zjarri.
