Ish-deputeti i Partisë Demokratike Endri Hasa ka reaguar pas arrestimit të ish-ministrit të mjedisit, Lefter Koka, i cili akuzohet se ka përfituar para nga dy kompani koncensionare të inceneratorëve të drejtuara nga Klodian Zoto dhe Stela Gungallia.
Nëpërmjet një postimi në rrjetet sociale, Hasa risjellë në vëmendje denoncimin e bërë në SPAK për inceneratorin e Elbasanit.
Ish-deputeti shkruan se nuk ka pasur asnjë dyshim që ky incenerator ishte ndërtuar mbi një aferë korruptive pasi u krijua vetëm 3 ditë para hapjes së procedurës.
Hasa thotë se sPAK duhet të vërë para drejtësisë, kryeministrin Edi Rama, zëvendëskryeministrin Arben Ahmetaj dhe kryebashkiakun e Tiranës, Erion Veliaj.
“Në 20 tetor 2020 dorëzova në SPAK kallëzin për Edi Ramën, Arben Ahmetaj, Lefter Kokën dhe administratoren e kompanisë, Albetk Energy për inceneratorin e Elbasanit. Nuk kemi pasur asnjë dyshim se inceneratori i Elbasanit ishte i ngritur mbi një mega aferë korruptive, pasi kjo kompani u krijua 3 ditë para hapjes së procedurës dhe kishte një kapital prej 1 mijë eurosh. Sot Lefter Koka është me pranga në duar, por SPAK duhet të shkojë përtej firmës së ish-ministrit Koka dhe të marrë të pandehur Edi Ramën, Arben Ahmetajn dhe Erion Veliajn”- shkruan Hasa./ Opinion.al
