“Policia i di autorët e vrasjeve të fundit në Shkodër”. Kështu do të deklaronte gazetari Artan Hoxha në një nga emisionet në Opinion, pas vrasjes së vëllezërve Bilali. Këtë të premte pas arrestimit të dy personave (LEXO KÊTU) si dhe shpalljes në kërkim të 26-vjeçarit Ibrahim Lici, gazetari thotë se kur do shteti “jo vetëm që e kap lepurin me qerre, por e vendos qerren në mes të rrugës dhe lepuri shkon e hipën vet në të”.
“Ja pra që për 11 muaj rresht nuk ia kemi futur kot se kush fshihet pas serisë sëe vrasjeve në Shkodër. Zbulimi i vrasjes nr. 10 dhe 11, Astrit dhe Brahim Bilali, është një ogur i mire se janë në rrugë të mbarë edhe zbulimi i vrasjeve të 15 korrikut 2018, 1 shtatorit 2018, 14 nëntorit 2018”, shkruan gazetari teksa ka publikuar dhe tre foto, ku me rreth është 26-vjeçari Ibrahim Lici.
I riu, i dyshuari kryesor i vrasjes së dy vëllezërve Bilali, është nipi i Fatbardh Licit i vrarë më 8 gusht 2018 dhe djali i Mustafë Licit, anëtar i këshillit bashkiak në Shkodër dhe drejtues i partisë Mendimi i Djathtë Liberal.
Nga ana tjetër viktima Fatbardh Lici është kunati i Lulzim Kullës, biznesmenit të njohur ndaj të cilit u bë atentat më 13 janar të vitit të kaluar me lëndë shpërthyese ku mbeti i plagosur. Ky atentat dyshohet se ishte dhe ngjarja që prishi qetësinë mes grupeve në Shkodër.
ATENTATET NË SHKODËR
13 janar 2018, atentat kundër biznesmenit Lulzim Kulla në afërsi të tregut popullor të qytetit të Shkodrës.
Qershor 2018, zhduken pa gjurmë Gëzim Hysa dhe nipi i tij Agron Molla.
18 qershor 2018, ekzekutohet me armë Mehdi Kavaja, pronar i një servisi.
15 korrik 2018, vriten në një atentat, në hyrje të banesës, ish-polici Boran Bercana dhe Silvi Ndoci, bashkëjetuese me të.
8 gusht 2018, vritet Fatbardh Lici, kunati i Lulzim Kullës dhe vellai i Mustafë Licit. Ky i fundit këshilltar bashkiak dhe drejtues i një partie politike me shtrirje lokale.
1 shtator 2018, vritet biznesmeni Arjan Ferracaku teksa po kalëronte bashkë me Asmir Bilalin. Dyshohet se autorët e atentatit ngatërruan shënjestrën.
14 nëntor 2018, në tregun popullor të Rusit vritet Fatos Ferracaku, kushëriri i Arjan Ferracakut.
20 mars 2019, në fshatin Grudë vritet Nard Polia, pronar i një bujtine në Theth, pjesëtar i administratës së Zonave të Mbrojtura.
30 mars 2019, vriten në derën e shtëpisë së tyre vëllezërit Bilali./Opinion.al
