Gjatë stinës së verës rastet e vjedhjeve të shtëpive janë më të shumta. Për pasojë edhe policia detyrohet të angazhohet më shumë në patrullimin e rrugëve. Në orët e para të mëngjesit në komisariatin e Monzës mbërriti një raportim për vjedhje në lagjen Cazzaniga. Një qytetar kishte parë dy persona që po kalonin nga ballkoni në një shtëpi, pronarët e së cilës ishin larguar me pushime.
Rreth orës katër policia arrin të arrestojë njërin prej tyre duke e kapur në flagrancë në tentativë për të fshehur qesen ku kishte futur disa orë dhe bizhuteri të vjedhura. Ai ishte nga shqipëria dhe quhet Elidon Gegaj.
Mëngjesin e së enjtes ndaj 23 vjeçarit ishte caktuar seanca për ti dhënë masën e arrestit por kur policët shkuan në qelinë e paraburgimit në komisariat ai ishte zhdukur.
Siç raportojnë mediat italiane, i riu kishte përfituar nga një moment i shpërqendrimit nga agjentëve, të cilët kishin qenë të pakët në ambientet e komisariatit në Brianza të inauguruar në Prill nga vetë Ministri i Brendshëm Salvini.
Gegaj kishte gjetur një hapsirë të përshtatshme midis shufrave të qelisë. Pastaj hapi një dritare, doli në zonën e jashtme të ndërtesës dhe më pas kapërceu një mur katër metra të lartë për të “fituar lirinë”.
Boshllëku që krijohet mes shufrave të hekurit dhe tavanit të qelisë ishte pika e dobët që shqiptari kishte arritur të identifikonte në komisariatin e ri. Konstrukti i hollë i trupit dhe aftësitë prej akrobati të cilat i shfrytëzonte edhe për vjedhje ja bën edhe më të lehtë arratisjen.
Ky episod “i çuditshëm” sic përshkruhet në mediat fqinje, ka bërë që elementet e sigurisë në ndërtesën e re të rishikohen nga fillimi. /Opinion.al
