Presidenti Ilir Meta është shprehur nga Durrësi se palët politike duhet të arrijnë sa më shpejtë në një zgjidhje të situatës politike pa dëmtuar edhe më shumë procesin e hapjes së negociatave me Bashkimin Europian në tetor.
Ai i bëri thirrje kryeministrit Edi Rama të heqë dorë nga shantazhet ndaj institucioneve si dhe i bëri thirrje partive politike të bëhen gati për zgjedhjet më 13 tetor, si data e vetme legjitime sipas tij.
Meta theksoi se ka një skenar për kapje të të gjithë pushteteve në Shqipëri nga mazhoranca, e cila siç tha ai “nuk jep llogari para askujt”. Por edhe opozita sipas presidentit i ka patur të gjitha mundësitë për të shmangur këtë situatat “po të kishte qenë me këmbë në toke”.
“Ajo që na shqetëson më shumë është ky teatri i madh politik absurd i cili kërcënon që Shqipëria të dërrmojë çdo mundësi që të çelë negociatat më 17-18 tetor. Prandaj ju bëj thirrje të gjithëve, në mënyrë të veçantë tre artistëve, ti japin fund këtij absurdi. Të marrim masa për zbatimet vendore më 13 tetor sepse qytetarët shqiptarë kanë nevojë që të kenë një qeverisje vendore të ligjshme dhe legjitime.
Zgjedhjet vendore nuk mendoj se zgjidhin gjithçka por ky është një detyrim ligjor dhe kushtetues i detyrueshëm, është i detyrueshëm për kryeministrin i cili duhet të heqë dorë nga presionet dhe shantazhet ndaj gjithë institucioneve të tjera duke penguar zbatimin e këtij dekreti dhe padyshim është përgjegjësi e gjithë të tjerëve të marrin pjesë në zgjedhjet e 13 tetorit.
Sot kam formalizuar një letër dërguar sekretarit të përgjithshëm të OSBE dhe kryetarit të radhës të OSBE, ministrit të jashtëm të Sllovakisë dhe presidentit të asamblesë parlamentare të OSBE-së. Ky është një moment historik për negocimin e të dyja palëve për gjetjen e një zgjidhjeje, pasi nuk kemi aspak kohë.
Kam insistuar për një dialog të qëndrueshëm politik jo për diversion, jo për demagogji por për marrjen e përgjegjësive të gjitha palëve për tu vendosur normaliteti
Sot kemi një parlament që nuk jep llogari para askujt, një shumicë që kontrollon gjithçka. Sot kemi një situatë jashtëzakonisht kaotike në të gjitha drejtimet. Kjo është përgjegjësi e palëve politike në vend. Opozita i ka patur të gjitha mundësitë për të parandaluar, me këmbë në toke edhe e përgjegjshme ndaj të gjitha këtyre marrëzive që kanë ndodhur në skenarin e kapjes së gjithë institucioneve në vend.“ u shpreh Meta. /Opinion.al
