Ministri Argjentinas i Shëndetësisë Ginés González García njoftoi se në 32,013 vaksinimet e para të kryera tek personelit shëndetësor me vaksinën ruse Sputnik V, kishte 317 raste me “efekte anësore”, nga të cilat 99.3% janë cilësuar si të lehta ose mesatare.
Duke folur mbi polemikat e ngritura në Argjentinë për sigurinë e vaksinës së prodhuar nga laboratori rus Gamaleya, García theksoi përmes Twitter se efektet anësore arrijnë në 1% dhe se prania e etheve, dhimbjes së kokës ose dhimbjes së muskujve, si simptoma unike ose shoqëruese, rezultoi në 80% të rasteve të regjistruara me efekte anësore.
Ministri më pas kujtoi se “në rastin e shfaqjes së këtyre simptomave, ato shfaqen brenda gjashtë orësh nga marrja e vaksinës dhe zhduken brenda 24-48 orësh”.
Nga ana e tij, Zëvendës Ministri i Shëndetësisë i qeverisë së qytetit të Buenos Aires, Nicolás Kreplak, komentoi se “reagimet e regjistruara me Sputnik V janë të ngjashme me ato të zbuluara në administrimin e vaksinave të tjera”.
Ditët e fundit, të dhënat për infeksionet janë përkeqësuar në Argjentinë: Ministria e Shëndetësisë raportoi se nga 31 Dhjetori deri më 2 Janar u regjistruan 20,906 infektime për një total prej 1,634,834 të prekurish që nga Marsi. Të vdekurit ishin 212, me një numër total prej 43,375./Opinion.al
