Partia Demokratike, nëpërmjet ish-deputetit Bardh Spahia publikoi ditën e sotme një urdhër të zv/drejtorit të shërbimeve klinike të Spitalit të Shkodrës ku njoftohej për ndërprerjen e operacioneve nga data 30 dhjetor deri në datën 6 janar “për arsye të mirëmenaxhimit dhe mirëplanifikimit të mbulimit të shërbimit mjekësor të urgjencës”.
Në lidhje me këtë denoncim ka reaguar drejtori i Spitalit të Shkodrës Ardian Dajti. Ai tha se operacionet janë anuluar vetëm për një ditë ndërkohë që ditët e tjera janë pushim zyrtar. Sa i përket shkresës së publikuar nga Spahia, Dajti shtoi se ajo është një komunikim i brendshëm i nëndrejtorit të spitalit me shefat e shërbimit për të krijuar një mbarëvajtje të punës përgjatë ditëve të festave.
“Më vjen keq që në këto ditë kur duhet të jemi në shërbim të pacientëve na duhet të reagoj për një postim në rrjetet sociale, mbi keqinterpretimin e komunikimit të brendshëm të një titullari të institucionit me shefat e shërbimit. Unë nuk e kam lexuar. Mora informacion nga mënyra si është para. Dua të bëj të qartë se shërbimi në spitalin e Shkodrës është në gatishmëri maksimale. Nuk ekziston asnjë urdhër. Është një komunikim që të jemi sa më të gatshëm për të menaxhuar këtë situatë. Në të gjithë botën ka anulim të operacioneve për të shtuar gatishmërinë. Nëse i referoheni periudhës në shkresë, bëhet fjalë vetëm për një ditë, pasi ditët e tjera janë ditë pushimi zyrtare. Vetëm ditën e hënë do të anulohen për t’u bërë në ditët në vijim. Asnjë operacion nuk pezullohet apo pengohet. Ai që e ka shkruar besoj se me një interpretim të thjeshtë e kupton që është një komunikim mes nëndrejtorit me dy shefat. Bëhet fjalë për një ditë sepse janë ditë pushim. Dhe në ditë pushimi nuk bëhen planifikime për operacione. Ky staf mjekësor i ka përballuar me vite këto flukse. Ai nuk është urdhër por një komunikim i brendshëm. Kjo po shfrytëzohet politikisht. Prej ditës së sotme po punohet normalisht”, tha Dajti. /Opinion.al
