Kreu i Grupit Parlamentar i PS, Taulant Balla u shpreh sot në Kuvend se mazhoranca është tërhequr nga votimi për paketën “anti-shpifja”, e cila është pranuar nga Komisioni i Venecias për shqyrtim.
Pas këtij vendimi, ka reaguar ambasadori i Bashkimit Europian në Shqipëri, Lugi Soreca. Përmes një postimi në rrjetet sociale, ambasadori përshëndet vendimin e mazhorancës, ndërsa shton që autoritetet të adresjonë shqetësimet lidhur me paketën “anti-shpifja”.
“Ne e mirëpresim vendimin e mazhorancës në pushtet për të shtyrë votimin për Ligjin për mediat audio vizive. Ne presim mendimin e Komisionit të Venecias dhe inkurajojmë autoritetet të adresojnë shqetësimet e organizatave të mediave dhe komunitetit ndërkombëtar.”-shprehet Soreca.
Ndërkohë, ka ardhur dhe reagimi i parë nga Partia Demokratike. Ish-deputetja demokrate Albana Vokshi e cilëson si fitore të fjalës së lirë tërheqjen e mazhorancës nga votimi. Ish-deputetja e quan propagandë boshe deklarimet e mazhorancës për të rrëzuar dekretet e presidentit Ilir Meta.
“Fitoi fjala e lirë. Edi Rama u betua për javë me rradhë që do të votojë në parlament paketën e censurës kundër medias online. Nuk la njeri pa kapur, gur pa lëvizur, por dështoi. U tërhoq sot nga votimit pa i shkuar deri në fund nismës antikushtetuese, kundër të cilës kanë dalë kundër gazetarët, opozita, Komisioni Europian, Këshilli i Europës, OSBE-ja. Stërbetimet se do të rrëzojnë dekretin e Presidentit që ktheu ligjin antikushtetues, përfunduan si propagandë boshe. Kauza jonë e drejtë fitoi një betejë. Edi Rama nuk e kaloi ligjin që kërcënon gazetarët me burg dhe median online me mbyllje dhe gjoba. Pushteti i Edi Ramës po shkërrmoqet dita ditës. Të gjithë bashkë, ne mund t’ia dalim të ruajmë liritë tona, lirinë e shprehjes, lirinë e votës, lirinë zgjedhjes”./ Opinion.al
