Sociale

Anketa/ Të ardhurat ekonomike dhe arsimi, shkaqet e dhunës ndaj grave


               Publikuar në : 17:42 - 08/10/19 |
xhu lia

Të dhënat e anketës së zhvilluar nga OSBE me temën “Mirëqenia dhe siguria e grave” kanë nxjerr në pah ekzistencën e dhunës ndaj gjinisë femërore apo të dhunës në familje, e lidhur kjo ngushtësisht edhe me gjendjen ekonomike të familjeve shqiptare.

Sipas anketës rezultoi që gratë që jetojnë me vështirësi ekonomike janë më të predispozuara të jenë pre e dhunës psikologjike dhe fizike nga partneri aktual (71 për qind në krahasim me 61 për qind në tërësi).

Ndërkohë gratë që kanë të ardhura të larta dhe janë me profesione të kualifikuara pohojnë se kanë përjetuar më shumë ngacmime seksuale.

Në prezantimin e këtyre të dhënave përfaqësues të qeverisë treguan rreth iniciativave lidhur me fuqizimin ekonomik të grave dhe eliminimin e dhunës.

“Fuqizimin e gruas përsa i përket statusit të saj ekonomik, në raport me edukimin në vazhdim në raport me punësimin si një prioritet,”-u shpreh gjatë fjalës së saj ministrja e shëndetësisë Ogerta Manastirliu.

Ndërsa ministrja e Drejtësisë Etilda Gjonaj tha: “Ofrimi i eksesit në drejtësi, përmes ndihmës juridike falas dhe tashmë kategoria e grave të cilat jetojnë dhunën në familje janë gra të cilat përfitojnë drejtpërdrejtë falas nga ndihma juridike që u ofrohet nga shteti,”-përfundoi ajo.

Gjithashtu sipas të dhënave të anketës, dhuna ndaj grave është e lidhur edhe me arsimimin e tyre dhe shtrirjen gjeografike, ku femrat me arsim të ulët janë më të prekura dhe ato në zonat veriore të vendit, po ashtu./Opinion.al/

Pas