Ambasada e Shteteve të Bashkuara në Tiranë ka apeluar që të trajtohet problemi i korrupsionit në burgje pasi sipas tyre kjo i mundëson rrjeteve kriminale të vazhdojnë të funksionojnë jashtë burgjeve.
Në një postim në Facebook, ambasada ka njoftuar mbi takimin mes Drejtorit të Byrosë për Çështjet Ndërkombëtare të Zbatimit të Ligjit dhe Luftës ndaj Drogës, Ben Rokuell dhe drejtorit të burgjeve, Agim Ismaili.
Ky takim u zhvillua në kuandër të ndihmës me kompjutera portativë dhe projektorë për Qendrën e re të Trajnimit, që SHBA i dha Shqipërisë.
Mes të tjerash, SHBA thekson se të burgosurit duhen trajnuar dhe përgatitur për riintegrimin në shoqëri pas lirimit të tyre.
Këto deklarata vijnë në një kohë kur në burgje kanë lindur protesta mbi kushtet e jetesës dhe dënimet e të burgosurve. Ata kanë kërkuar gjithashtu shkarkimin e drejtorit të përgjithshëm, Agim Ismaili.
Mesazhi i ambasadës:
Ambasada e Shteteve të Bashkuara mbështet reformat e sistemit të menaxhimit të burgjeve, përfshirë Qendrat e Trajnimit për Oficerët Korrektues. Si pjesë e mbështetjes, Drejtori i Byrosë për Çështjet Ndërkombëtare të Zbatimit të Ligjit dhe Luftës ndaj Drogës Ben Rockëell i dorëzoi Drejtorit të Përgjithshëm të Burgjeve Agim Ismaili në fillim të kësaj jave kompjutera portativë dhe projektorë për Qendrën e re të Trajnimit. Menaxhimi modern i burgjeve kërkon përgatitje të specializuar profesionale për zyrtarët e sigurisë së burgjeve, gjë e cila po ofrohet nga Qendra e Trajnimit. Reformat në vazhdim janë krijuar për të balancuar sigurinë me kërkesat humanitare dhe rehabilituese për t’i përgatitur të burgosurit për riintegrimin në shoqëri pas lirimit të tyre. Reformat duhet të trajtojnë gjithashtu edhe korrupsionin që u mundëson rrjeteve kriminale të vazhdojnë të funksionojnë jashtë burgjeve. Kjo është një sfidë për të gjitha sistemet e burgjeve, dhe një sfidë e veçantë në Shqipëri. Ndihma e Shteteve të Bashkuara të Amerikës është një investim në përpjekjet e partnerëve tanë dhe i tillë që do t’i bëjë të dy vendet tona më të sigurta. Ne mirëpresim të shohim rezultatet./ Opinion.al
