Një pjesë e deputetëve të Partisë Demokratike kanë depozituar në Kuvend një amendament më anë të të cilit synojnë deklasifikimin e të gjitha dosjeve të ish-Sigurimit të Shtetit. Në lidhje me këtë deputeti Enkelejd Alibeaj në Komisionin e Ligjeve ditën e sotme tha se nga qeveria ka ardhur projektligji i ri por nuk e ka trajtuar këtë çështje.
Sipas tij, shoqëria duhet të njohë të shkuarën për të parë se cilët kanë qenë viktimat e sistemit diktatorial, por dhe për të hequr njëherë e përgjithmonë modelin e shantazhit që përdoret duke u bazuar te dosjet e sigurimit që siç thotë Alibeaj aplikohet edhe në politikë.
“Në korrik një pjesë e deputetëve të PD kanë depozituar një amendament me anë të të cilit synojmë që të adresojmë një çështje që ka interes publik dhe që është çështja e hapjes së dosjeve të Sigurimit, deklasifikimi i dosjeve. Shoqëria sot ka nevojë që të njohë të shkuarën e vet për shumë arsye, për të parë se cilët kanë qenë viktimat e sistemit diktatorial, por edhe për një arsye tjetër për të hequr njëherë e përgjithmonë psikozën, modelin e shantazhit që përdoret duke u bazuar te dosjet e sigurimit dhe që aplikohet edhe në politikë. Nuk ka zgjidhje më të mirë për të ushtruar shantazh politik me hapjen e dosjeve se sa të deklasifikohen. Nga qeveria ka ardhur projektligji i ri, nuk shoh nga ana e qeverisë të ketë trajtuar çështjen e deklasifikimit të dosjeve. Nuk është sekret që të dhëna sensitive të shtetit shqiptar janë në duar të pasigurta. Mediat përditë po nxjerrin të dhëna, fakte, emaile, foto. Kjo është një çështje shumë e rëndësishme që duhet të preokupojë sigurinë kombëtare. Ky projektligj duhet të na mbrojë nga mosrrjedhja e informacionit të klasifikuar. Çfarë ka ndodhur? Cilat kanë qenë arsyet dhe masat e marra nga qeveria shqiptare për të parandaluar atë se çfarë ka ndodhur? Unë shoh që nga ana e qeverisë nuk sillet asnjë masë legjislative e shtuar që të jetë në funksion të asaj që ka ndodhur”, tha Alibeaj.
Sakaq, Ministrja e Shtetit për Marrëdhëniet me Parlamentin, Elisa Spiropali u përgjigj: Një shqetësim i ngritur nga Autoriteti i Dosjeve duhet të ishte shteruar shumë kohë më parë për ti hapur rrugë një politike që është e çliruar nga hijet e së shkuarës. Referuar propozimit tuaj për deklasifikimin e dokumenteve që kanë lidhje me Sigurimit nga 1944- deri në korrik 1991, me sa kuptoj nga opinioni që ka dhënë Autoriteti, nuk ka asgjë të keqe për t’a bërë. Kur verifikohen dokumente që kanë lidhje me sigurinë kombëtare, ato nuk deklasifikohen. Një çështje e tillë që kërkon pastrimin e politikës nga njerëz që kanë ushtruar aktivitet kriminal, të mos kenë më vend në politikën tonë të lartë. Ne kemi disa propozime tona në ligje të tjera, te Kodi Zgjedhor dhe ligje të tjera. Edhe këtë do ta bëjmë për tu ndarë njëherë e mirë si klasë politike nga e shkuara. Për pyetjen mbi të dhënat personale, ka një ndjeshmëri të lartë. Ne jemi të vetëdijshëm që problemi nuk është i vogël, ama edhe masat që janë marrë për të neutralizuar sulmin, kanë qenë po aq masive. Ligji për të dhënat personale është në konsultim publik dhe do kemi rast të flasim gjerësisht për këtë ligj./Opinion.al
