Ka nisur para Ministrisë së Brendshme protesta e lajmëruar më herët nga Aleanca për Mbrojtjen e Teatrit, si një reagim qytetar pas ndalimit të disa aktivistëve të kësaj lëvizjeje nga policia një ditë më parë.
Arkitekti Astrit Seranaj, një prej të ndaluarve ka deklaruar se ndaj tyre është ushtruar dhunë brenda ambjenteve të komisariatit.
“Ishte një incident që mund të shmangej. Ishte e pakuptimtë pse ndodhi. Kërkova të kaloj tek pedonalja si çdo natë, sepse lokalet janë të hapur dhe njerëzit kalojnë. Mbrëmë ndodhi që nuk u lejova dhe u ktheva mbrapsh. Në momentin që i jam bindur urdhrit të policisë me uniformë, pati një urdhër që mund të ketë ardhur nga ndonjë polic civil apo ndonjë shef, që mund të ketë qenë aty, por policët me uniformë më kapën dhunshëm të më shoqëronin. I thashë: mos më prek me dorë, sepse e respektova urdhrin dhe nuk kalova. Më kërkuan kartën e identitetit dhe ja tregova. Në të gjithë momentin mënyra se si më mbanin ka qenë shumë e dhunshme. Nga krahu i majtë kam hematoma. Edhe anëtarët e tjerë që erdhën, u dhunuan dhe ata, e madje është hequr dhe video që për 10-15 minuta u regjistrua. Në komisariat u ushtrua dhunë fizike. Kjo është e paparanueshme, dhunë brenda komisariatit. Njëri nga policët që më shoqëroi që nga zona ku ndodhi incidenti ishte ai që më qëlloi. Kolegun Donald Martini e goditën me shkelm në fytyrë”, tha Seranaj duke u shprehur se tashmë ata kanë nisur edhe procedurat ligjore lidhur me çfarë deklarojnë./Opinion.al
