Agron Duka, kreu i PAA nuk do të jetë në parlament. Ai garoi i 5-ti në listën e PD-së në Durrës, por PD-ja shkoi deri tek mandati i 4-t. Duka nuk mundet ta shprehë dëshpërimin. Ai shprehet për mediat se duhet të kishte provuar forcat me partinë e tij dhe s’duhej të përfshihej në listën e Lulzim Bashës. Gjithsesi, Duka thotë se humbja nuk duhet të shihet vetëm si përgjegjësi personale e kreut të opozitës.
Më tej, Duka tregoi telefonatën që ka patur mbrëmë me Bashën:
“Dje kam folur në telefon, më tha a ka shanse të merret mandati i pestë, i thashë jo. E pashë ishte i mërzitur, më vjen keq edhe për të se nuk kam pse të gëzohem që ai ka këtë rezultat. Ai është djalë i ri, i thashë se humbët betejën duhet të shihni përpara. Kjo është shumë e vështirë, por me forcë karakteri njeriu e kalon”- tha Duka.
Ai tha se mendoi se po të punonte fort mund të kapte mandatin e 5. “Tashmë që bëj analizën e gjendjes, me çdo lloj sigle unë do të kisha dalë shumë më mirë, do tentohej edhe 2 mandate në Durrës, gabimi që bëmë, faji ishte imi, besova shumë.
Vendimi që mora për të hyrë me PD i pesti, ishte i gabuar, po të dilja vetëm mund të ishte rezultat pozitiv.
“PD i kishte strukturat inekzistente. Kur fillova punën pata shumë vështirësi të takoj me njerëz tek e tek, pastaj nisa t’i grupoj. Mendova se mund të fitonim 5-6 mandate. Fakti tregoi se nuk ngjizet për një muaj, kërkon një punë të mjaftueshme. Në Shijak ishte dobët, në Spitallë ishte skandal. Ka pasur shumë shit-blerje votash në mënyrë masive. PD shkonte me një shishe uji në fushatë. Unë bëra një fushatë shumë më të spikatur, dinjitoze për atë zonë që më caktuan. Këto janë faktorët kryesorë”, u shpreh ai.
