Partia Demokratike dhe Ministria e Brendshme kanë shkëmbyer akuza në distancë lidhur me komandimin e Agim Hysit në postin e kreut të SHÇBA.
Sipas Ministrisë së Brendshme, Agim Hysi nuk është emëruar drejtor i SHÇBA por zv. drejtor i saj.
Në një reagim zyrtar ndaj akuzave të Partisë Demokratike, Ministria e Brendshme shprehet se Agim Hysi është pajisur me certifikatë sigurie, vërtetim nga Autoriteti për Informimin mbi dosjet e ish-Sigurimit të Shtetit, si dhe ka dorëzuar rregullisht formularin e Vetë-deklarimit për garantimin e integritetit të personave që zgjidhen, emërohen ose ushtrojnë funksione publike, të gjitha këto përpara se të emërohej në detyrën që mban aktualisht.
Sot deputeti i PD, Gent Strazimiri tha se me emërimin e Hysit në krye të SHCBA dëmtohet procesi i vettingut në polici, pasi sipas tij Agim Hysi ka qenë ish-gjyqtar në Vlorë dhe Gjirokastër dhe është shkarkuar nga KLD për shkelje.
Ish-kryeministri Berisha e ka kundërshtuar që në fillim këtë emërim.
REAGIMI I MB:
Lidhur me deklaratën e radhës së PD-së, përmes së cilës tentohet të hidhet baltë mbi procesin e Vetting-ut në Polici, i cili pas miratimit të bazës ligjore brenda pak ditësh do të nisë zbatimin, sqarojmë se:
Z.Agim Hysi nuk është emëruar Drejtor i Përgjithshëm i Shërbimit për Çështjet e Brendshme dhe Ankesat. Ai është Zv/drejtor i Përgjithshëm, i komanduar përkohësisht prej datës 16 mars 2018, me qëllim sigurimin e funksionimit normal administrativ të institucionit, në kushtet e mungesës për momentin të një Drejtori të Përgjithshëm.
Ndërkohë prej datës 16 mars ka nisur procedura për përzgjedhjen dhe emërimin e Drejtorit të ri të SHÇBA-së dhe shumë shpejt është drejt finalizimit.
Sjellim në vëmendjen e publikut gjithashtu se përveç të shkuarës si gjyqtar, z.Hysi ka shërbyer si ndihmës ligjor pranë Gjykatës së Lartë në vitet 2011-2012, si dhe pranë Zyrës së Avokatit të Shtetit deri në emërimin e tij si Zv/drejtor i Përgjithshëm i SHÇBA. Nënvizojmë se nuk kishte dhe nuk ka asnjë pengesë ligjore që z.Hysi të emërohet apo të qëndrojë në këtë detyrë. Agim Hysi është pajisur me certifikatë sigurie, vërtetim nga Autoriteti për Informimin mbi dosjet e ish-Sigurimit të Shtetit, si dhe ka dorëzuar rregullisht formularin e Vetë-deklarimit për garantimin e integritetit të personave që zgjidhen, emërohen ose ushtrojnë funksione publike, të gjitha këto përpara se të emërohej në detyrën që mban aktualisht.
Duke iu përgjigjur interesit të medias dhe në respekt të opinionit publik, mbi bazën e Ligjit “Për vlerësimin kalimtar të punonjësve të Policisë së Shtetit, Gardës së Republikës dhe SHÇBA-së”, sqarojmë se edhe vetë SHÇBA-ja do të jetë objekt i këtij ligji, përfshirë zotin Hysi.
Vettingu është dëshmia e qartë e vullnetit tonë për të ndërtuar institucione të forta, me njerëz me integritet, për të konsoliduar Agjencitë ligj zbatuese dhe për t’i barazuar me standardet europiane.
Reagimi i PD:
Ministria e Brendshme ka nxjerrë një reagim ku thotë se PD po hedh baltë mbi procesin e vettingut. Por Ministria e Brendshme nuk thotë ku e hodhi baltën PD dhe cilat nga të dhënat nuk qëndrojnë. PD nuk ka thënë se Agim Hysi është emëruar, ka thënë është komanduar, njësoj si Ministria e Brendshme. PD, bazuar mbi dokumenta, të shpërndarë në media, ka thënë se Agim Hysi është shkarkuar si gjyqtar nga KLD dhe Gjykatat, përfshi edhe Strasburgun, kanë rrëzuar kërkesat e tij.
Organi që drejton gjyqtari i shkarkuar Agim Hysi me urdhër të Fatmir Xhafës bën vettingun e përditshëm të policisë, sepse e ka detyrë funksionale të zbulojë dhe t’i raportojë Ministrit të Brendshëm nëse policët kryejnë veprimtari të paligjshme.
PD kërkon zbatimin e standardeve të Gjykatës së Strasburgut, jo standardet e Xhafës, që kontrollon policët nëpërmjet një gjyqtari të shkarkuar nga KLD.
