Nga Alteo HYSI-
Kaosi me përzgjedhjen e maturantëve fitues në Universitetet publike duket se nuk ka mjaftuar që Ministria e Arsimit, Rektorati i Tiranës, Fakultetet Përkatëse të Universitetit të Tiranës, të reflektojnë dhe të gjejnë mënyrën se si mund të përmirësojnë shërbimin publik, për arsimimin e studentëve shqiptarë.
Gjatë ditës së djeshme qarkulloi një tjetër udhëzim skandaloz i Ministrisë së Arsimit, sipas të cilit studentët kanë mundësi të regjistrohen në programin Master, vetëm prej datës 07 Tetor deri në 12 Tetor, nëse preferojnë Universitetet Publike.
Ndërsa për aplikimet në Universitetet private afati është 11 Tetor me 17 Tetor. Por nuk është vetëm koha më e madhe që kanë dispozicion aplikimet për në universitetet privatë shqetësimi, kohë e cila sigurisht ngre spekulimin se studenti shtyhet drejt privatit.
A mendoi Ministria e Arsimit për kohën fare të shkrutër që i nevojitet një studenti që është diplomuar në datë 8 Tetor (studentët e Gazetarisë), se sa kohë i duhet për aplikimin?
Si mundet një student që sapo është diplomuar në 8 Tetor, të përgatisë gjithë dokumentat burokratikë për në datë 11 Tetor të Aplikimit në Universitetin e tij?
Për çudi, ditën e sotme, nga faqja zyrtare e Ministrisë së Arsimit është zhdukur ky udhëzim, nr.24 që u linte studentëve vetëm katër ditë kohë për tu regjistruar në Programin master pranë Universitetit Publik.
Pranë fakulteteve, ditën e sotme qarkulloi lajmi se ky afat është shtyrë. Pra, mesa duket, brenda natës Ministria ka reflektuar dhe është përpjekur për të korrigjuar gafën e vet. Por sa serioze është kjo? A nuk është shenjë e mungesës së seriozitetit në një çështje kaq serioze që i përket të ardhmes së qindra studentëve?
Çudia në sistemin tonë arsimor nuk përfundon me kaq. Le të ndalemi te faza e Aplikimit.
Konkretisht, për të aplikuar në nivelin Master të një dege pranë Fakultetit të Historisë dhe Filologjisë, nevojitet një listë notash e noterizuar, vërtetim për mbrojtjen e diplomës, shoqëruar me dokumentat identifikues.
Për të marrë nga ky fakultet një vërtetim për mbrojtje diplome ose listë notash, studenti duhet të paguajë në bankë 2000 lekë (të vjetra), plus komisionin e bankës, shkon në 4 mijë lekë.
Llogaria: Nëse ju nevojitet edhe listë notash, edhe vërtetim, pagesa shkon në 800 lekë. Pa llogaritur këtu, pagesën për noterizimin e dokumentave të kërkuara.
Ditët e fundit në fakt, i kanë gjetur studentët e Tiranës në rradhë të gjata nëpër banka, për të kryer pagesat e nevojshme, nën kushtet e presionit të kohës. Po ditën e sotme, pa asnjë njoftim zyrtar, vetëm përmes shpërndarjes gojë më gojë të informacionit, u njoftua se edhe ky rregull, i pagesës për një vërtetim, është zhbërë.
Në rastin e afateve është fare e qartë se ka një kaos, shprehje e një ç’organizimi në veprimtarinë e institucioneve të arsimit të lartë, të cilat nuk arrijnë dot të llogarisin distancën kohore që i nevojitet një studenti për tu diplomuar, informuar mbi hapat e mëtejshëm të aplikimit për master, dhe afatet ekzakte të aplikimit.
Në rastin konkret, studentët e Fakulutetit të Historisë dhe Filologjisë janë njoftuar për afatin (7 Tetor me 12 Tetor) e aplikimeve në Master, po në datë 7 përmes një emaili nga zv.dekani i këtij fakulteti.
Një proces i përshpejtuar, mungesa e informacionit, i kushtëzuar nga raporti kaotik që kanë drejtuesit e arsimit me kohën dhe vetveten, është sigurisht në dëm të studentëve, të cilët duke e ndarë kohën mes zyrave të infromacionit dhe arkave të bankës për një vërtetim, e kanë të pamundur të reflektojnë se cila është zgjedhja e duhur për ta!
Alteo Hysi/ Opinion.al
