Kryeministri Edi Rama është sot në Vlorë për të prezantuar projektin e aeroportit të ri që do të ndërtohet.
Rama tha se aeroporti do të ndërtohet tani për arsye të kontekstit turistik të Shqipërisë dhe duke qenë se janë përmbushur disa kushte.
“Në 5 vjet ne kemi më shumë se dyfishuar numrin e turistëve në Shqipëri” tha Rama gjatë fjalës së tij. Sipas tij tashmë ka “kërkesa për investime në hoteleri nga kompani të rëndësishme të huaja” por kryeministri nuk përmendi ndonjë nga ato.
Sa i përket ndërtimit të aeroportit Rama tha se ende nuk është marrë një vendim se si do të procedohet për ndërtimin e tij por shtoi se janë dy mundësi, “ta ndërtojë një kompani ndërkombëtare ose ta fillojmë vetë ndërtimin”. Ndërtimi nga shteti sipas Ramës do të shpejtonte procesin dhe shmangte çdo proces negocimi me kompanitë private.
“Kemi përcaktuar një buxhet për ta ndërtuar vetë aeroportin. Një vendim do ta marrim së shpejti duke parë se sa shprehje interesi do të kemi. Do të shohim nëse do të ketë njëfarë interesi nga kompani që i plotësojnë ambiciet tona” tha Rama
Në çdo rast ndërtimi i aeroportit do të kërkojë kontraktimin e një kompanie për të kryer punimet. Kryeministri nuk dha detaje se si do të procedohet në këtë rast.
Në lidhje me aeroportin Rama tha se ai do të jetë më i madh se i Tiranës dhe se “duhet” të jetë me më shumë rëndësi se i Tiranës.
“Aeroporti nuk do të jetë turistik. Ajo që më ka shtyrë në këtë vendim është se në Tiranë e dimë se çfarë vështirësish kemi nga një marrëveshje shumë kushtëzuese. Mungesë kapacitetesh, çmime të larta dhe na është dashur të negociojmë dy vite pasi kontrata me konçesionarin thoshte se nuk mund të ndërtohej aeroport tjetër pa marrë leje te konçesionari” deklaroi kryeministri.
Rama shtoi gjithashtu se pista e uljes së avionëve në aeroportin e Vlorës do të jetë 3.2 km, pra 500 metra më e gjatë se ajo e Tiranës.
Ndër të tjera Rama i premtoi qytetarëve të Vlorës se qeveria është duke u angazhuar për të arritur një marrëveshje për ndërtimin e tunelit të Llogarasë dhe zgjatjen e Lungomares nga të dyja krahët, nga Uji i Ftohtë deri në Pyllin e Sodës. /Opinion.al
