Prokurori i Përgjithshëm Adriatik Llalla përmes një shkrese dërguar Kuvendit, shprehet kundër pr/ligjit të Partisë Demokratike për një hetim ndërkombëtar të CEZ dhe thotë se Prokuroria Shqiptare ka të drejtën të hetojë këtë çështje, sipas Kushtetutës. Letra i është dërguar kryetarit të Komisionit të Ligjeve, Fatmir Xhafaj. Gazeta “Shqiptarja.com” ka publikuar këtë letër, në të cilën thuhet se Kushtetuta njeh të drejtën e hetimit vetëm nga institucioni i drejtuar nga Llalla.
“Në përgjigje të shkresës suaj, me anë të së cilës kërkohet mendim për projektligjin ‘Për lejimin e hetimit të pavarur mbi akuzat publike të ngritura mbi çështjen CEZ Shpërndarje Sh.a’, Prokuroria shprehet kundër projektligjit të propozuar. Prokuroria Shqiptare është i vetmi organ në vend që duhet dhe mund të ushtrojë ndjekjen penale dhe të përfaqësojë akuzën në gjyq në emër të shtetit, bazuar në nenin 148 të Kushtetutës së Republikës së Shqipërisë. Prokuroria Shqiptare ka legjitimitetin, integritetin dhe kapacitetet e duhura për të hetuar çdo vepër penale të kryer brenda territorit të Republikës së Shqipërisë dhe jashtë saj, nëpërputhje me parimet e përgjithshme të së drejtës penale”, thuhet në shkresën e kryeprokurorit Llalla.
