Lavdrim Muhaxheri, luftëtar vullnetar në Siri dhe një ndër personat më të kërkuar në Ballkan, ka qenë në rajon së paku një herë në muajt e fundit. Një burim i besueshëm i ka thënë Opinion.al se sipas burimeve të inteligjencës perëndimore, Muhaxheri ka hyrë në Kosovë dhe Maqedoni në mënyrë ilegale ku ka qëndruar shkurt. Po i njëjti burim thotë se informacionet janë që ai të ketë udhëtuar edhe në Shqipëri, por ndryshe nga dy vendet e tjera kjo nuk konfirmohet ende. Muhaxheri ka udhëtuar kryesisht vetëm dhe ai ka pasur një pamje ndryshe nga ajo e zakonshmja që jemi mësuar të shohim në TV. Mendohet se ka qenë pa mjekër. Nuk dihet shkaku i ardhjes, por besohet se kjo nuk është hera e vetme që ai vjen në rajon. Angjesitë e inteligjncës e kanë marrë lajmin pas largimit të tij dhe janë duke hetuar kontaktet e mundshme në këtë zonë.
Muhaxheri është njeriu më i mediatizuar mes shqiptarëve që luftojnë në Siri. Ai kërkohet nga policitë e disa vendeve, por nuk ka arritur të kapet. Ndërkohë që 23 shqiptarë të tjerë që kanë luftuar në Siri janë kthyer ndërkohë.
