Ilir Meta ka thirrur parlamentin në seancë të jashtëzakonshme ditën e hënë pasdite. Por a do të votohen komisionet e reja të Vetingut pa opozitën e cila vazhdon protestën? Çfarë do të ndryshojë gjatë kësaj fundjave? Vetë Rama deklaroi prerë sot se vetingu do të bëhet me çdo kusht, por ai iu shmang pyetjes së drejpërdrejtë të gazetarit se: A do të votohen këto ligje pa opozitën?.
Nga ana tjetër Basha tha se nuk futet në zgjedhjet e përgjithshme pa u bërë qeveria teknike.
Tashmë mbetet për të parë se si do të shkojnë negociatat. Burimet për opinion.al thanë se grupe të caktuara pranë partive (PD, LSI, PS) janë vënë në lëvizje për të mundësuar tryezën e liderve.
Gjithsesi edhe nëse negociatat dështojnë mazhoranca mund ti votojë e vetme komisionet e Vetingut, pasi kërkohet shumicë e thjeshtë. Mbetet për tu parë roli i Metës i cili gjithnjë ka deklaruar se reforma në drejtësi duhet bërë vetem me opozitën.
Seanca e jashtëzakonshme
Avokati i Populli dorëzoi dje në Kuvend listën e OMN-së me emrat e kandidatëve që do bëjnë rivlerësimin e gjyqtarëve dhe prokurorëve. Sakaq Ilir Meta njoftoi thirrjen e seancës së jashtëzakonshme, ku në rend të së cilës është pikërisht votimi i komisionit të vettingut. Kuvendi pritet të mblidhet të hënën në orën 18:00.
Konkretisht në rendin e ditës janë: votimi i projektvendimit “Për procedurat parlamentare për funksionimin e komisioneve ‘ad hoc’ dhe realizimin e procesit të votimit sipas ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë” (neni 55, Rregullore, votim me shumicë të thjeshtë); dhe projektvendimi “Për krijimin dhe përbërjen e komisionit ad hoc për verifikimin e kandidatëve për institucionet e rivlerësimit sipas ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë” (neni 55, Rregullore, votim me shumicë të thjeshtë).
/R. D.- Opinion.al
