Ligjërisht koalicioni i majtë që qeveris vendin PS-LSI ka pushuar së ekzistuari në mesnatë në orën 00:00 kur përfundoi afati për regjistrimin e koalicioneve në KQZ.
Këto dy parti kanë kërkuar që të shtyhet afati i regjistrimit. Pra, dy partive të mëdha u duhet kohë deri më 3 Maj për të vendosur: Nëse do të garojnë në zgjedhje veçmas apo si koalicion.
Komisioni Qendror i Zgjedhjeve ka deklaruar se do të mblidhet sot në orën 13:00 për të shqyrtuar kërkesën e dy partive në pushtet.
Është KQZ ajo që ka në dorë fatin e këtij koalicioni… të paktën për momentin!! Nëse KQZ vendos shtyrjen e afatit, atëherë Rama-Meta do të kenë kohë edhe 10 ditë për të përmbyllur marrëveshjen e bashkëpunimit, në të kundërt koalicioni konsiderohet i shpërbërë.
Mbledhja e sotme është thirrur në orën 13:00. Deri tani, dy anëtarë të zgjedhur nga PD në KQZ, Klement Zguri dhe Hysen Osmanaj kanë paralajmëruar votën kundër. Anëtari më i vjetër i KQZ, Zguri deklaroi se 19 Prilli ishte data ligjore për të përfunduar regjistrimin. “Kërkesa e dy partive nuk është legjitime. Kërkuesit nuk kanë autorizim për këtë kërkesë”, tha ai. Po ashtu edhe Hysen Osmanaj deklaroi se çdo vendim që mund të marrë KQZ, qoftë me shumicë të cilësuar apo me votë të thjeshtë, vendimi do të jetë nul, sepse bie në kundërshtim me Kodin Zgjedhor”. Pritet për tu parë vota e të zgjedhurve nga e majta në KQZ…
Ka edhe një mundësi tjetër. Ndryshimi i Kodit Zgjedhor në Parlament, por për këtë duhet shumicë me 84 vota.
/Riviera Dedaj-Opinion.al
