“Parlamenti është tempulli i demokracisë dhe në tempull nuk thuhen fjalë të papranueshme dhe nuk bëhen gjeste të papranueshme”. Është ky komenti i Jozefina Topallit, e cila ishte e ftuar në një emision televiziv në Tv Klan, në lidhje me incidentin e javës së kaluar në parlament, ku nënkryetari i PD, Edi Paloka sulmoi me bojë Kryeministrin Edi Rama.
Megjithatë për ata që kanë pak kujtesë dhe në kohën kur zonja Topalli ishte drejtuese e Kuvendit, kanë ndodhur plot përplasje mes deputetëve. E pyetur se a do rikthehet në politikë, Topalli u përgjigj: “Unë do të gënjeja po të thoja që nuk e ndjek politikën, e ndjek në çdo moment. Do doja shumë që të ishte ndryshe, do doja shumë që të bënte kujdes për këta fëmijë dhe për prindërit e këtyre fëmijëve, të ishte më e vëmendshme. E kam për të gjithë fëmijët, nuk bëj diferenca. Do kisha dashur që të ishte më me dashuri dhe më normale. Nuk e di a do të kthehem… por është si një lloj droge, unë e ndjek në çdo moment. Shpesh mërzitem, shpesh mendoj se gjërat duhen ndryshuar tërësisht. Ndonjëherë mendoj që ky vend nuk bëhet, por pastaj them përse nuk bëhet, ky vend bëhet që ç’ke me të, mjafton që ta duash.”
Ndërkohë fotoja e kryeministrit Edi Rama, i bërë i gjithi me bojë, është renditur te fotot e javës së agjencisë prestigjoze të lajmeve “Reuters”. Të enjten, gjatë seancës plenare, deputeti demokrat Edi Paloka hodhi me anë të një shiringë bojë në drejtim të kryeministri Edi Rama. Sado që u përpoq të mbrohej, Rama nuk i shpëtoi dot spërkatjes. Sipas Palokës, kjo ishte një kundërpërgjigje e tij ndaj ofendimeve të kryeministrit Rama. G.F/ Opinion.al
