Kur ende nuk kanë përfunduar orët dhe ditët e entuziasmit për marrëveshjen Rama-Basha, ka nga ata që e shohin këtë lidhje të re dhe si gijotinën e karrierës së tyre politike apo karriges së ministrit.
Me gjithë skepticizmin dhe talljet e herëpashershme me Çadrën e Lirisë, jo pak por plot 9 ministra dhe ca më shumë drejtorë agjensish të rëndëishme u bënë “viktima” të protestës së opozitës.
Të ndodhur në këto kushte dhe pavarësisht luftrave të vogla që kanë brenda PS, ndoshta ish ministrat dhe ish drejtorët e rëndësishëm të Edi Ramës është mirë të organizohen në një shoqatë që fare thjesht mund të jetë ajo e “të shkarkuarve nga qeveria për shkak të Çadrës”.
Si të ngjashme kjo shoqatë mund të ketë atë të policëve të liruar nga detyra. Me ndryshimin e vetëm që shoqata e të shkarkuarve nga Çadra ka në përbërje emra të njohur socialishtësh të fortë.
Ajo mund të drejtohet nga ish ministri Saimir Tahiri, i shkarkuari i parë për shkak të protestës së opozitës dhe një nga ministrat më besnikë të Edi Ramës. Sekretar teknik parashikohet të jetë Artan Lame, “viktima” e fundit e marrëveshjes Rama-Basha dhe që ende nuk e ka zgjidhur dilemën nëse është person politik apo teknik.
Me marrëdhëniet me publikun mund të merret Olta Xhaçka si më me eksperiencë në këtë fushë, ndërsa financat mund t’i besohen për shkak të punës së suksesshme ish drejtorit të OSSHE Adrian Çela.
E gjitha sa më sipër është një mënyrë hipotetike për të angazhuar politikisht dhe për të mbajtur me punë njerëzit e besuar të Edi Ramës që deri pak kohë më parë ishin dhe bashkëpuntorët më te afërt të tij.
Mbase fushata do t’i mbajë të angazhuar dhe për pak javë, por pas përfundimit më shumë se politika një pjesë e mirë e tyre do të kenë mjaftueshëm kohë të lirë për tu angazhuar me shoqatën e të “shkarkuarve nga Çadra”.
Ndoshta pas zgjatimit të marrëveshjes Rama-Basha, mund të ketë dhe të shkarkuar të tjerë që do të duan t’i bashkohen kësaj shoqate, por mesa duket grupi iniciator i saj ka vendosur të ruajë anëtarësinë vetëm me emrat që jo vetëm ishin të parët që u bënë “viktima të çadrës” por dhe që besuan deri në fund se Edi Rama nuk do t’i lëshonte kurrë bashkëpuntorët e tejet vlerësuar dhe të afërt për dashurinë e re me Lulzim Bashën./Satirë-opinion.al
