Kreu i Partisë së Lirisë, Ilir Meta, në një konferencë për mediat komentoi edhe zhvillimet e fundit në PD.
Lidhur me përjashtimin e 4 deputetëve nga grupi parlamentar i PD, ai tha se është një prej manovrave të Edi Ramës për të hequr vëmendjen nga skandalet e tij.
Ndër të tjera, Meta tha se të katërt deputetët kanë reflektuar sepse kërkojnë që të vendosin Salianjin në krye të grupit parlamentar të PD, deputet që më 8 janar ka qenë në anën tjetër, në të kundërtën e ‘Foltores’.
“Nuk më takon mua të komentoj zhvillime të tilla, pasi qëndrimi im se kush është PD është i qartë. Vendimi është marrë në 6 mars. Unë respektoj vendimin e popullit. Lidhur me këtë çështje, me aq sa kam parë ka ndodhur një paradoks. Katër deputetët që janë shembullorë në etikën e tyre, paskan bërë një super reflektim për ngjarjen e 8 janarit kanë firmosur sipas lajmeve për të pranuar si kryetar grupi një njeri që më 8 janar ka qenë në anën tjetër, në të kundërtën e ‘Foltores’, zotin Salianji. Por unë them që çdo manovër e Edi Ramës është një përpjekje për të hequr vëmendjen nga skandalet e korrupsionit të tij”, tha Meta.
