Ambasadori britanik në Shqipëri Alastair King-Smith,ka folur lidhur me shpalljen non grata kryetarit të PD, Sali Berisha nga Britania.
Në një intervistë për “News 24”, kryediplomati britanik në vendin tonë është shprehur se deklaratat e kryetarit të PD janë për qëllime politike dhe se ai ndodhet në Shqipëri për të përfaqësuar politikën e vendit të tij.
Pjesë nga intervista:
Pyetje: Fakti që keni marrë një vendim të tillë për zotin Berisha, do të thotë që qeveria juaj ka një vendim të tillë, apo dosje , apo prova. A do ti përcillen këto prova institucioneve të qeverisë shqiptare
Përgjigje: Përsëri, theksoj se nuk do të komentoj për raste individuale. Natyrisht, ne kemi një partneritet midis institucioneve të drejtësisë këtu dhe institucioneve të drejtësisë në Mbretërinë e Bashkuar. Aty ku ka kërkesë për ta bërë këtë, por nuk do të komentoj për raste individuale.
Pyetje: Berisha ju etiketoj si një burokrat të korruptuar, a keni një përgjigje?
Përgjigje: Nuk kam ndërmend të bëj komente konkrete veçse të them se në një kohë kur zgjedhjet lokale po afrohen, ne e dimë që politikanët ndonjëherë bëjnë akuza dhe përpiqen të bëjnë deklarata në mbështetje të qëllimeve të tyre politike. Ky nuk është roli i ne diplomatëve, dhe si ambasador britanik, unë jam këtu për të përfaqësuar qeverinë dhe popullin britanik. Do të sigurohem të bëj këtë. Do t’i shpjegoj sa më qartë politikat e qeverisë britanike. Por nuk më takon mua të shkëmbej akuza apo komente.
Pyetje: Akuza kaq të forta a mund të anashkalohen kaq lehtë?
Përgjigja: Siç thashë, roli im këtu është të përfaqësoj qeverinë dhe popullin britanik dhe unë do të vazhdoj ta bëj këtë.
