E trishtë është historia e të riut Lear Kurti i cili ndërroi jetë pas shoqërimit në komisariatin e Policisë nr.3 në Tiranë. Në një intervistë që ka dhënë për Top Channel babai i 32-vjeçarit tregon se nuk është babai biologjik i tij, por adoptues.
Arturi thotë se e ka marrë të riun kur ishte 2 vjeç nga shtëpia e Fëmijës për ta rritur bashkë me bashkëshorten ndërsa sot e kërkon nëpër dyert e morgut për t’i parë trupin. Më tej ai hedh akuza ndaj policisë për vdekjen e të birit.
“Nuk e kam parë trupin e djalit. Kam qenë gjithë natën jashtë morgut dhe sot dhe nuk më kanë dhënë asnjë lloj shpjegimi. Gjeta ata të SHKB-së aty më thanë nuk dimë gjë, kur të bëhen ato… nga ora 10 ose 11 do të të themi”.
Shkaku i vdekjes së të riut është ende i paqartë, ndërsa policia dhe spitali i Traumës kanë dhënë deklarata kontradiktore.
Agjencia e Mbikqyrjes policore thotë se 32-vjeçari u largua me shpejtësi kur pa patrullën dhe në momentet e shoqërimit në komisariat shfaqi probleme shëndetësore. Më pas sipas policisë ai u dërgua në spital dhe ndërroi jetë aty. Ndërkohë Spitali i Traumës ka deklaruar se 32-vjeçari ka mbërritur pa shenja jete në spital.
