Një 60-vjeçar ka mbetur i plagosur me armë zjarri në autostradën Laç – Lezhë.
Sipas policisë, rreth orës 00:25 Besim Zeneli, banues në zonën e Shullazit në Kurbin, është qëlluar me armë zjarri gjatë kohës që ndodhej në biznesin e tij, dyqan fruta-perimesh. Si pasojë e të shtënave Zeneli ka marrë plagë në trup dhe është transportuar në Spitalin e Traumës në Tiranë, ku ndodhet nën kujdesin mjekësor.
Ndërkaq, uniformat blu bëjnë me dije se policia ka shoqëruar 3 persona në komisariat që mendohet se kanë dijeni për ngjarjen, mes të cilëve dhe autorin e dyshuar.
Njoftimi i policisë
Rreth orës 00:25, gjatë kohës që shtetasi B. Z. 60 vjeç, banues në fshatin Shullaz, Kurbin, ka qenë në biznesin e tij (dyqan fruta-perimesh) që ndodhet në anë të rrugës, në autostradën Laç – Lezhë, është qëlluar me armë zjarri në drejtim të tij.
Për pasojë, shtetasi B. Z. ka marrë plagë në trup dhe ndodhet në Spitalin e Traumës në Tiranë, nën kujdesin mjekësor.
Grupi hetimor vijon veprimet në vendin e ngjarjes, duke administruar çdo provë dhe vlerësuar çdo informacion, për zbardhjen e plotë të rrethanave të ngjarjes.
Shërbimet e Policisë kanë shoqëruar 3 persona, mes tyre dhe autorin e dyshuar të ngjarjes dhe po kryejnë veprimet hetimore për dokumentimin e plotë ligjor të ngjarjes dhe arrestimin e autorëve të dyshuar.
Për momentin nuk bëjmë me dije identitetin e personave të shoqëruar, për shkak të vijimit të hetimeve dhe ruajtjes së sekretit hetimor.
