Kreu i PD, Sali Berisha, në një konferencë për mediat i është përgjigjur pyetjes së gazetarëve për nismën e PS për ish-bashkëpunëtorët e Sigurimit të Shtetit.
Berisha tha se ky është një ligj anti-Meta që bazohet në shpifje.
Po ashtu ai theksoi qëndrimin e tij se PD është e gatshme që ta kthejë ligjin e lustracionit.
“PD gjatë periudhave të saj në pushtet ka miratuar 2 ligje për lustracionin. Në praktikën botërore dhe evropiane, ligjet e dekriminalizimit janë tjetër, të lustracionit janë tjetër. Me lustracionin, PD përjashtonte nga funksionet publike të gjithë bashkëpunëtorë, agjentë dhe informatorë të Sigurimit të Shtetit. Ky ligj është vënë në zbatim në vitin 1996 dhe është kopje e plotë e ligjit të miratuar në Çekosllovakinë e asaj kohe dhe u amendua nga socialistët në pushtet duke hequr komponentin lustracion.
Për këtë arsye, PD në vitin 2008 miratoi në Parlament ligjin e lustracionit. Për hir të së vërtetës, identik me atë që ishte sepse ishte ligj me një mbështetje të plotë nga Gjykata Kushtetuese e Shqipërisë por dhe një lloj miratimi nga institucionet ndërkombëtare. Veç kësaj, shumica e PD miratoi në vitin 1995, një vit para lustracionit, ligjin për dënimin e krimeve kundër njerëzimit. Mbi bazën e këtij ligji u dënuan 73 zyrtarë duke nisur nga Presidenti tek një komandant që zvarriti trupat e të pushkatuarve në kufi. Ky ligj i dërguar nga PS u quajtur Kushtetues dhe është edhe sot në fuqi. Ne kemi qenë dhe do jemi për ligjin e lustracionit. Atë që bën PS, duket se është ligj që po ta quajmë ndryshe, ligji anti-Meta, por kjo është një gjë, e cila bazohet në një shpifje të qartë, të hedhur poshtë nga vetë autori për të cilën akuzohet”, tha Berisha.
