Një ditë pas ngjarjes së rëndë të ndodhur në fshatin Grudë e Re në Shkodër, ku u vra me armë zjarri punonjësi i Ujësjellës Kanalizimeve, Prek Tonaj kanë dalë detaje të reja.
Mësohet se autori i krimit, sapo ka hyrë në lokalin ku ndodhej viktima dhe persona të tjerë, i ka paralajmëruar ata që mos të lëviznin se ndryshe do i vriste.
“Mos lëvizni, se ju vrava. Spostohuni!”, mësohet të ketë thënë autori i maskuar (ende i paidentifikuar), ndërsa mbante një kallashnikov në dorë.
Fill pas këtij paralajmërimi, ai i është drejtuar viktimës, duke i thënë se; “a e di se na ke borxh?” dhe ka qëlluar me kallashnikov duke e lënë të vdekur në vend.
Sipas news 24, vrasja e 47-vjeçarit vjen pas disa krimeve të ndodhura mes 3 fiseve, njëri prej të cilëve fisi Tonaj.
Raportohet se ka qenë Pal Ksolla, ai që ka vrarë Nikollë Tonaj në komunizëm në burg, ndërkohë që në vitin 1996 ai u vra po nga ky fis.
Në 2011 dyshohet se nga fisi Hasanaj është vrarë Zek Tonaj dhe është plagosur babai i tij. Zanafilla e konfliktit ka qenë për çështje votash në zgjedhje, por me pas janë konfliktuar në një urë në Dukagjin ku ka ndodhur edhe vrasja.
Ndërkohë, ditën e djeshme është vrarë Prek Tonaj, ndërsa nisur nga e kaluara grupi hetimor dyshon se edhe kjo ngjarje mund të ketë si motiv gjakmarrjen./Opinion.al
