Dhjetëra civilë palestinezë të uritur u qëlluan nga forcat izraelite pranë një qendre ndihmash në Rafah. Dëshmitarë nga terreni dhe mjekë në spitalin Nasser të Khan Younis flasin për plagë me armë zjarri në kokë, gjoks dhe shpinë.
Ngjarja ndodhi para agimit të së dielës më 1 qershor, ndërsa mijëra të pastrehë prisnin ndihma nga një qendër e drejtuar nga Gaza Humanitarian Foundation (GHF) dhe e mbrojtur nga ushtria izraelite. Sipas autoriteteve palestineze, u vranë të paktën 31 persona dhe u plagosën mbi 200 të tjerë.
Forcat izraelite pranojnë se kanë qëlluar si paralajmërim ndaj “të dyshuarve që po afroheshin”, por mohojnë të kenë qëlluar civilë. Megjithatë, dëshmitë e mbledhura nga vendngjarja tregojnë të kundërtën.
Dëshmitë nga terreni:
Tareq Almasri, 44 vjeç, nga al Mawasi: “Isha nisur natën për të marrë ushqim për fëmijët. Pranë rreth-rrotullimit al Alam, mijëra njerëz ishin mbledhur. Ushtria izraelite na tha të mos kalonim një vijë, por turma u shty përpara nga frika se ndihmat do mbaronin. Fillimisht qëlluan në ajër, pastaj drejt nesh. Nga të gjitha anët – nga dronë, tanke, kodra dhe deti”.
Mjekët në spitalin Nasser e përshkruajnë si ngjarjen me numrin më të madh të të plagosurve nga armët zjarri që nga hapja e spitalit. Dr. Marwan al-Hams thotë se “Shumica e plagëve ishin në pjesën e sipërme të trupit, në kokë dhe kraharor”.
Hani Baraka, babai i pesë fëmijëve, humbi vëllanë e tij Shuhada, i cili u qëllua në kokë dhe tregon se “Droni izraelit ra pas një përplasje me kabllon elektrike. Njerëzit vrapuan drejt tij, dhe aty nisi të shtihej pa mëshirë. Shuhada u vra në vend”.
Kufizimi i informacionit:
Media ndërkombëtare nuk ka akses në Gaza, çka e bën të pamundur verifikimin e pavarur të ngjarjes. Filmimet e shpërndara nga GHF tregojnë vetëm zonën brenda kompleksit humanitar, jo zonën e masakrës. TvKlan
