Mbledhja e sotme e Këshillit Kombëtar të PD-së kishte në mungesë nënkryetarin Alfred Rushaj, ndërkohë që Lulzim Basha teksa e vuri në dukje mugesen, e falënderoi për punën e kësaj periudhe. Dukej si një falenderim lamtumire, ndonëse Basha tha se janë duke punuar për një projekt të përbashkët politik, ndërsa mungesën e tij në mbledhje e lidhi me arsye shëndetësore.
“Edhe pse z. Rushaj nuk është sot prezent në mbledhje për arsye shëndetësore, unë dua ta falenderoj atë për gjithë punën e jashtëzakonshme që ka bërë gjatë kësaj periudhe, dhe bashkërisht jemi duke punuar për një projekt të përbashkët politik për të ardhmen, që ndihmon dhe con përpara sfidat që ka PD”, tha Basha.
Por ndërsa propozoi emrat e rinj për strukturat e partisë dhe komisionet parlamentare, Basha duket se ka lënë tashmë pa asnjë funksion nënkryetarin dhe kryetar I grupit parlamentar, Alfred Rushaj.
Ndërsa Enkelejd Alibeaj u propozua në krye të grupit parlamentar, Agron Gjekmarkaj është emri që përveç nëkryetarit të kuvendit është propozuar edhe si nënkryetar partie.
“Fillimisht dua tju informoj se me një vendim të përbashkët timin dhe të Kryetarit të Grupit Parlamentar z. Alfred Rushaj, kemi vendosur me dakordësi, që drejtimi i Grupit, me sfidat e reja që kemi përpara, t’i kalojë z. Enkelejd Alibeaj. Nga ana tjetër, do të propozoj si Nënkryetar të Kuvendit, z. Agron Gjekmarkaj, që gjithashtu kërkoj nga Këshilli Kombëtar që të votohet edhe si Nënkryetar i Partisë Demokratike. Një përfaqësues i denjë i demokratëve, botës akademike dhe komunitetit katolik. Jam i bindur se z. Gjekmarkaj është vlerë e shtuar në lidershipin e Partisë Demokratike”, tha Basha.
A është ende Alfred Rushaj pranë Bashës? Mbetet të shohim./Opinion.al
