Bashkia e Hasit ka reaguar në lidhje me vdekjen e foshnjës 3 muajshe.
Përmes një postimi në faqen zyrtare të “Facebook”, Bashkia Has bën me dije se familjes së foshnjës i është ofruar mbështetje, duke iu ofruar atyre banesë sociale, ushqime dhe medikamente.
Ndër të tjera në reagimin e bërë shkruan se mamaja e foshnjës ishte diagnostikuar me probleme të shëndetit mendor dhe se ka propozuar vendosjen e fëmijës në një institucion të përkujdesit për fëmijë, e cila është kundërshtuar nga gjyshja.
“Në emër të gjithë qytetarëve të Hasit, Bashkia e Hasit i shpreh ngushëllimet më të thella familjes Peca për humbjen tragjike të foshnjes.
Bashkia Has në bashkëpunim me partnerë të tjerë në vazhdimësi ka qenë e vëmendshme ndaj nevojave të familjes duke i mbështetur ata, duke i ofruar banese sociale, ushqime dhe medikamente.
Krahas kësaj ndihme, nga strukturat e shërbimit social, nëna mbështetet me pagesën e programit të aftësisë së kufizuar. Gjithashtu është përfituese e ndihmës ekonomike.
Duke qenë se zonja është diagnostikuar me problematika të shëndetit mendor, grupi teknik ndërsektorial ka propozuar vendosjen e fëmijës në një institucion të përkujdesit për fëmijë, si një masë emergjente pasi prindi nuk mund të ushtrojë përgjegjësinë prindërore, masë e cila u kundërshtua nga gjyshja e fëmijës, e cila ka deklaruar se do të kujdeset për fëmijën. Në këto kushte, pas deklaratës së lëshuar nga gjyshja e fëmijës, ka qenë i pamundur transferimi në institucion rezidencial.
Edhe një herë Bashkia Has me pikëllim dhe dhimbje, shpreh ngushëllimet më të thella familjes dhe të afërmve të fëmijës për humbjen e rëndë”-shkruan në reagim Bashkia Has./Opinion.al
