Prokurorët francezë kanë liruar sot burrin saudit, i cili u arrestua dje në lidhje me vrasjen e gazetarit Jamal Khashoggi.
Mësohet se autoritetet franceze kanë thënë se konkluduan se i arrestuari ishte viktimë e identitetit të gabuar.
Khaled Alotaibi, 33 vjeç, u arrestua në një aeroport në Paris të martën në bazë të një urdhër-arresti të lëshuar nga Turqia, shkruan BBC.
Një roje mbretërore saudite me të njëjtin emër dhe moshë, i cili është listuar në listën e personave të shpallur në kërkim nga SHBA dhe Britania, dyshohet për vrasjen e Khashoggit në Stamboll në vitin 2018.
Ambasada saudite në Paris tha të martën mbrëma se personi i mbajtur në Francë nuk kishte asnjë lidhje me rastin.
Ajo kërkoi lirimin e tij të menjëhershëm dhe theksoi se të gjithë ata që morën pjesë në vrasje ishin dënuar nga një gjykatë saudite dhe po vuanin dënime me burg në mbretëri.
Turqia e quajti vendimin e gjyqit saudit si “skandaloz”, duke thënë se zyrtarëve të lartë që dërguan një ekip prej 15 agjentësh nga Riadi për të vrarë Khashoggi-n, iu është dhënë imunitet.
Një gjykatë në Stamboll po gjykon aktualisht 26 zyrtarë sauditë në mungesë me akuzat e vrasjes me paramendim ose shkatërrimit të provave./Opinion.al
