Deputetja e Partisë Demokratike, Jorida Tabaku, reagoi pas njoftimit se në listën e projekteve të miratuara nga Korporata e Investimeve Shqiptare është përfshirë edhe ndërtimi i një kulle pranë Pallatit të Kongreseve, duke e cilësuar këtë si një tjetër shembull të mënyrës sesi po administrohet pasuria publike në vend.
Në një video të publikuar në rrjetet sociale, Tabaku u shpreh se debati nuk ka të bëjë me nostalgjinë ndaj objekteve të së shkuarës, por me mbrojtjen e interesit publik dhe mënyrën sesi merren vendimet për pronat që u përkasin qytetarëve.
Sipas saj, Korporata e Investimeve është kthyer në një institucion që vepron pa kontroll, pa auditim dhe pa transparencë të mjaftueshme publike, ndërsa merr në administrim prona shtetërore dhe vendos për zhvillimin e tyre pa një proces të qartë llogaridhënieje.
Tabaku argumentoi se rasti i Pallatit të Kongreseve nuk është i izoluar, por pjesë e një modeli më të gjerë që, sipas saj, është parë edhe në Zvërnec, në Aeroportin e Vlorës dhe në Portin e Durrësit. Në të gjitha këto raste, tha ajo, pasuria publike trajtohet si pronë e një pakice, ndërsa qytetarët mbeten jashtë procesit të vendimmarrjes.
Deputetja demokrate e lidhi këtë fenomen me atë që e cilësoi si “sistemi i përqendrimit të ekonomisë dhe pasurisë në pak duar”, duke argumentuar se mungesa e garës, transparencës dhe meritokracisë po dëmton zhvillimin ekonomik të vendit.
“Ky është sistemi që i nxjerr njerëzit në rrugë për të protestuar. Sistemi që përqendron pasuritë tek pakica, merr vendime pa llogaridhënie dhe e trajton pronën publike si pronë vetjake. Këtë sistem duhet ta ndryshojmë”, u shpreh Tabaku.
Ajo theksoi se Shqipëria ka nevojë për një ekonomi të hapur, me konkurrencë të ndershme dhe me rregulla të barabarta për të gjithë, ku pasuria publike të administrohet në interes të qytetarëve dhe jo të grupeve të privilegjuara.
“Asnjë nostalgji për reliket e vjetra të komunizmit, por respekt dhe interes për pronën publike dhe pasurinë publike. Korporata e Investimeve ka njoftuar se në listën e gjatë të mbi 10 lejeve që ka dhënë për ndërtime në pronë publike, tashmë shtohet edhe kulla pranë Pallatit të Kongreseve. Korporata e Investimeve është një nga institucionet më abuzive, më të pakontrolluara, të paraportuara dhe të paaudituara, e cila merr prona publike dhe jep leje ndërtimi. Po kush janë këta që sillen me pronën publike sikur ta kenë pasurinë e tyre? Kush janë këta që veprojnë pa dhënë llogari, që marrin vendime pa asnjë transparencë? Në pronat publike po ndërtohet masivisht dhe askush nuk di çfarë po ndodh. E njëjta situatë është në Zvërnec. E njëjta situatë është në Aeroportin e Vlorës. E njëjta situatë është në Portin e Durrësit, ku pasuria publike trajtohet si mall personal, ku nuk ka vendimmarrje transparente dhe nuk ka konsultim të gjerë me opinionin publik. Ky sistem është pikërisht ai sistem që i nxjerr njerëzit në rrugë për të protestuar. Është sistemi që ka sjellë përqendrimin e ekonomisë në pak duar dhe formën më abuzive të vendimmarrjes që ka njohur Shqipëria. Është sistemi që ka përqendruar pasuritë tek pakica. Sistemi që merr vendime pa llogaridhënie. Sistemi që e trajton pronën publike si pronë vetjake. Këtë sistem duhet ta ndryshojmë. Këtë sistem duhet ta largojmë për Shqipërinë. Që vendi të ketë një ekonomi të hapur, të ketë garë dhe, në fund të ditës, të ketë meritokraci edhe në ekonomi”,-tha Tabaku.
