Gjatë inspektimit të punimeve të “Lungomare 2” në Vlorë, kreu i qeverisë, Edi Rama, nuk ka qenë i shoqëruar nga kryebashkiaku i qytetit, Dritan Leli, siç ndodh përherë në vendet që kryeministri inspekton, ku gjithmonë vërehet nën shoqërinë e kryebashkiakëve.
Siç shfaqet edhe në videon e postuar nga vetë Rama në rrjetet sociale, ai është në shoqërinë e dy përfaqësuesve të firmës ku interesohet për detajet e projektit.
Në një moment ai pyet për fushën e basketbollit dhe ambientet e tjera sportive. Përfaqësuesi i firmës, tha se njëra prej tyre ka përfunduar nga kryebashkiaku Dritan Leli, ndërsa të tjerat, do të jenë gati para sezonit turistik.
Ai është përgjigjur duke thënë: “Ta bëjmë ta mbarojmë se të presim të vdekurin e bashkisë…”.
Pas fitores së zgjedhjeve kryeministri Edi Rama ka vijuar rutinën e tij të inspektimeve. Ndërkohë që marrëdhënia e tij me Dritan Leli është prishur pasi ky i fundit nuk pranoi të ishte pjesë e ekipit të kandidatëve për deputet të Partisë Socialiste në qarkun e Vlorës duke dalë kundër Edi Ramës.
Akti i Lelit u pa si tradhti nga socialistët, të cilët e dëbuan nga postet politike, por jo atë publik pasi mandati i kryebashkiakut i përfundon në korrik të vitit 2023./Opinion.al
