Ditën e sotme Komisioni i Sigurisë ka rrëzuar dekretin e Presidentit, Ilir Meta për ligjin e “Policisë së Shtetit”. Në mbledhjen e Komisionit deputetët deputetet e mazhorancës votuan kundër dekretit, ndërsa deputeti Myslim Murrizi votoi pro tij.
Mazhoranca është shprehur se argumentimet që Presidenti ka dhënë për këtë dekret nuk qëndrojnë. Sipas deputetes së PS, Antonenta Dhima, në këtë dekret presidenti ka ecur me teori subjektive dhe konspirative.
“Është e qartë që jemi në harmoni të plotë me detyrat e shtetit në kohë zgjedhjesh, në përputhje me parashikimet e kodit zgjedhor. Nuk ka prapaskena të prezumuara. Në komentet e tij Presidenti ka ecur me teori subjektive dhe konspirative”, u shpreh deputetja Dhima.
Ndërkohë, duke qenë se ligji është votuar më herët dhe kur i shkoi Metës për miratim ai e ktheu, me votimin e sotëm propozimi i socialistëve do t’i kalojë Komisionit të Ligjeve e më pas për rivotim në Kuvend. Sipas këtij propozimi, Policia e Shtetit ka të drejtën të mbikëqyrë qytetarët pa marrë më herët aprovim nga organet e drejtësisë.
Argumentet e Metës
1- shkel parimin e ndarjes dhe balancimit të pushteteve, duke cënuar pavarësinë kushtetuese të Prokurorisë së Përgjithshme dhe Prokurorisë së Posaçme kundër Korrupsionit dhe Krimit të Organizuar.
2- Bie ndesh me parime të rëndësishme që qëndrojnë në themelet e shtetit të së drejtës të përcaktuara ngë Kushtetutën e Republikës së Shqipërisë dhe në Konventën Europiane për të Drejtat e Njeriut, që lidhen me grancitë për ruajtjen e privatësisë;
3- Rrezikon ta kthejë Policinë e Shtetit në një organ që gjurmon qytetarët jashtë një procesi penal dhe kontrollit të organeve të drejtësisë, dhe ta vërë nën presionin qeveritar gjatë fushatës dhe procesit zgjedhor, nën urdhrat e vullnetit politik, duke cenuar edhe pavarësinë operacionale të saj;
4- Shkakton trajtim të pabarabartë dhe pasiguri për vendin e punës, për punonjësit e Policisë së Shtetit, duke sanksionuar lëvizjen e tyre në pozicione të tjera, edhe pa miratim paraprak, me pasojë humbjen e përftimeve që kanë prej statusit të veçantë për shkak të detyrës./Opinion.al
