Presidenti Ilir Meta ka reaguar në lidhje për situatën e krijuar nga pandemia COVID-19 në vendin tonë.
Përmes një postimi në “Facebook”, Meta shprehet se sistemi shëndetësor rrezikon të zhytet në kolaps, pasi deri më tani qeveria nuk ka një plan apo strategji konkrete ndaj pandemisë.
Presidenti thotë se është e domosdoshme të shtohet numri i testimeve për COVID-19, ndërsa shton se duhet të miratohet edhe një plan koordinimi transparent me sistemin privat, për të bashkuar të gjitha energjitë dhe kapacitet e duhura.
Meta i bën thirrje qeverisë qëtë bëjë çdo përpjekje për rimbursimin e plotë të shpenzimeve, veçanërisht të pacientëve që mjekohen në banesë, të familjeve me ndihmë ekonomike dhe të pensionistëve.
Reagimi
Në mungesë të një plani dhe strategjie konkrete për të përballuar përhapjen masive të pandemisë COVID-19, të reflektuar me shtim çdo ditë të numrit të qytetarëve të infektuar, fatkeqësisht edhe të humbjeve në jetë, sistemi shëndetësor rrezikon të zhytet në kolaps të thellë, me pasoja tepër të rënda për shëndetin e qytetarëve.
Në këto kushte, është tepër e domosdoshme të shtohet masivisht numri i testimeve, si një mjet efikas për gjurmimin dhe trajtimin në kohë të qytetarëve të prekur nga COVID-19.
Për këtë qëllim të miratohet pa vonesë edhe një plan koordinimi i qartë dhe transparent me sistemin privat, për të bashkuar të gjitha energjitë dhe kapacitet e duhura.
Thelbësore gjithashtu është vënia në efiçencë të plotë të mjekut të familjes, shtimi i stafit mjekësor dhe atij mbështetës, si dhe planifikimi i buxhetit të duhur në ndihmë të tyre.
I bëj thirrje Qeverisë të bëjë çdo përpjekje për rimbursimin e plotë të shpenzimeve, veçanërisht të pacientëve që mjekohen në banesë, të familjeve me ndihmë ekonomike dhe të pensionistëve./ Opinion.al
