Kreu i grupit parlamentar të Partisë Socialiste Taulant Balla ka shpjeguar arsyet e rrëzimit nga Komisioni i Ligjeve, të dekretit të Presidentit Meta, për ndryshimet në Kodin Zgjedhor.
Sipas Ballës çështjet e miratuara në marrëveshjen e 5 Qershorit e po kështu edhe ato që lidhen me hapjen e listave janë realizuar 100% dhe ditën e enjte, kuvendi do të votojë raportin përfundimtar të komisionit.
“Ditën e enjte Kuvendi i Shqipërisë duhet të votojë raportin përfundimtar të Komisionit, që rrëzon Dekretin e Presidentit. Pas hyrjes në Fletoren Zyrtare, kodi është i detyrueshëm për t’u zbatuar nga palët”, tha Balla duke pohuar se nuk ka kohë për të humbur me aventurat e presidentit Meta.
“Siç dhe e dini, implementimi i ligjit zgjedhor kërkon kohën e vet, institucionet përgjegjëse kërkojnë kohën e tyre. Dhe duke qenë se kemi një kod ku qytetarët do të votojnë përveç subjekteve edhe për kandidatët, kjo është një kohë e volitshme, e shkurtër e vogël, që institucionet të përgatisin procesin zgjedhor”, u shpreh Balla./Opinion.al
