Duke folur për ndryshimet zgjedhore Kryeministri Rama tha se pavarësisht kundërshtimeve të opozitës brenda apo jashtë kuvendit, ligji do të votohet. Ai u shpreh se nga ky kompromis edhe PS ka arsyet e saj për të qenë e pakënaqur.
“Nuk ka një komopromis ku një palë i fiton të gjitha. Dhe kompromiset e mia janë zakonisht kompromiset ku të gjitha palët kanë një arsye për t’u mërzitur. Edhe ne kemi arsyet tona për t’u mërzitur. Madje që të jemi të qartë kemi më shumë arsye për t’umërzitur ne se sa palët që janë në process, qoftë brenda e qoftë jashtë. Por jemi të vetëdijshëm që detyrimi për të bërë kompromisin e nevojshëm për procesin e zgjedhjeve është që të heqim dorë nga dëshirat tona. Për ata që nuk janë këtu ky parlament po bën më shumë se sa ka bërë më parë për ndonjë palë që ka qenë brenda”.
Rama disa herë ju referua presidentit në fjalën e tij, ndërsa tha se Meta nuk është përmbajtur me qëndrimet e tij as përpara homologëve të huaj.
“Nuk ka asnjë problem të më sulmoni mua, jam mësuar me origjinalin, kopjet nuk më bëjnë përshtypje. Dëgjova një zonjë këtu që fliste me një gjuhë që një nënë nuk mund ta ketë dhe një grua nuk mund të ketë, që një përfaqësuese e parlamentit nuk mund ta ketë. Shembullin më skandaloz e ka dhënë presidenti i republikës së Shqipërisë i cili si askush tjetër nuk ka kapacitetin moral mendor që të përmbahet të paktën në ditën kur ka një homolog për vizitë, nuk më kujtohet ta ketë bërë Saliu kur ka pasur ndonjë të huaj në krah të ketë përdorur fjalor shantazhues e depresiv për kundërshtarët”.
Më tej, me tone të ashpra dhe ironike Rama tha se PS do të vazhdojë të drejtojë vendin, ndërsa duke ju drejtuar opozitës në kuvend tha se partia e tij nuk është një lopë për t’u mjelë.
“Ça kërkoni ju nga ne? Ça e dini ju PS, shërbëtoren tuaj apo shërbëtoren e atyre që janë jashtë? Ne jemi këtu për t’u shërbyer atyre që na kanë zgjedhur dhe këtij vendi që do vazhdojmë ta udhëheqim doni apo nuk doni ju. E dini pse do vazhdojmë ta udhëheqim ne këtë vend? Sepse ky popull nuk është budalla. Nuk merrni vota ju, as me lista të mbyllura, as me lista të hapura, as me lista të shyqera, sepse shqiptarët nuk janë budallenj. Ca e dini ju PS? Një lopë që ju keni gjetur një kovë ta milni? I ra kova Lulit rrugës dhe ju kërkoni të milni PS?” tha Rama./Opinion.al
