Damian Gjiknuri, përfaqësuesi i PS në Këshillin Politik, i ka dërguar një përgjigje argumenteve të parashtruara në e-mail-in e dërguar më 27 shtator nga Oerd Bylykbashi dhe Petrit Vasili, përfaqësues të PD dhe LSI në atë Këshill dhe duke i propozuar që mbledhja e ardhshme e Këshillit Politik të zhvillohet ditën e enjte, 1 tetor, në orë 11:00.
Përfaqësuesi i PS në Këshillin Politik, Damian Gjiknuri ka propozuar që mbledhja e radhës në Këshillin Politik të mbahet ditën e enjte, më 1 tetor, në orën 11:00.
Në një përgjigje për përfaqësuesit e opozitës në Këshill, Gjiknuri shkruan se “gjatë debatit të fundkorrikut për amendamentet kushtetuese, qëndrimi zyrtar i PD dhe LSI ka qenë se amendamentet kushtetuese ndalonin koalicionet, se ky ndalim vinte në kundërshtim flagrant me marrëveshjen e “5 qershorit” dhe prandaj amendamentet kushtetuese nuk duhet të miratoheshin në atë kohë. Gjithçka, veç ato amendamente të pengoheshin me çdo kusht! Përpjekja juaj dështoi dhe sot ju e pranoni zyrtarisht se amendamentet kushtetuese nuk i ndalonin koalicionet” .
Sipas Gjiknurit opozita jashtëparlamentare ishte “kundër procesit kushtetues, dhe jeni po aq kundër procesit ligjvënës në zbatim të tij. Ju bëtë gjithçka për ta bllokuar atë. Ne kemi qenë të përgatitur dhe e prisnim këtë sjellje. Por asgjë nuk mund të na shtynte ne që, për këtë shkak, të mbyllnim derën e bashkëpunimit. Kemi pasur nevojë të njihnim qartë pozicionin tuaj, të lexonim argumentet, të kuptonim motivet”.
Në përfundim të letrës së tij ai thotë se është i sigurt në kushtetutshmërinë e amendementeve, sikurse “ka besim të plotë se bashkëpunimi konstruktiv dhe në mirëbesim me opozitën parlamentare do t’i japë atyre formën e pëlqyeshme konsensuale që meritojnë”, dhe për këtë arsye do të tentohet “një përpjekje e fundit për një kompromis me opozitën jashtëparlamentare, pa vënë në rrezik arritjet dhe filozofinë e re që përcakton fryma e ndryshimeve kushtetuese për çështjen e koalicioneve”./ Opinion.al
