Një 43-vjeçar nga Tirana ka rënë në prangat e Policisë së Dibrës, pasi u kap në flagrancë duke ruajtur i armatosur një parcelë me 300 bimë të dyshuara narkotike Cannabis Sativa në fshatin Guri i Zi.
Sipas policisë, në kuadër të operacionit antikanabis, shërbimet e Komisariatit të Policisë Dibër, në bashkëpunim me strukturat e DVP Dibër dhe Forcën e Posaçme “Shqiponja”, ndërhynë në një zonë të pyllëzuar ku arrestuan shtetasin L.M 43 vjeç, banues në Tiranë.
Gjatë operacionit, efektivët sekuestruan një armë zjarri tip pushkë dhe 6 fishekë, të cilat dyshohet se përdoreshin për ruajtjen e parcelës. Një pjesë e bimëve narkotike u sekuestrua si provë materiale, ndërsa pjesa tjetër u asgjësua me djegie.
Në vijim të hetimeve, policia nisi procedim penal në gjendje të lirë edhe ndaj shtetasit H. Sh., kryetar i fshatit Guri i Zi, i dyshuar për veprën penale “Shpërdorimi i detyrës”.
Materialet procedurale i janë referuar Prokurorisë së Dibrës për veprime të mëtejshme, ndërsa operacioni antikanabis vijon.
