Më shumë mbetje urbane u hodhën jashtë vendgrumbullimeve gjatë vitit të shkuar megjithëse në tërësi u raportua për më pak mbeturina të menaxhuara sipas të dhënave nga Instituti i Statistikave (INSTAT).
Bashkitë raportojnë rritje të mbulimit me shërbim komunitar për menaxhim të mbetjeve. Nga viti 2018 në vitin 2019 mbulimi është rritur me 22.2 për qind. Konkretisht shërbimi në vitin 2018 mbulonte 1.8 milionë banorë rezidentë, ndërsa në vitin 2019 mbulimi shkoi në 2.5 milionë.
Por kjo rritje e mbulimit me shërbim nuk është reflektuar në më shumë mbetje urbane të trajtuara. Sipas INSTAT, në vitin 2018 ndërmarrjet publike dhe private që menaxhojnë mbetjet trajtuan 1.3 milionë tonë mbetje urbane ndërsa në vitin 2019 vetëm 1.08 milionë tonë.
Nga ana tjetër qeveria ka lejuar ndërtimin e impianteve të djegies së mbetjeve për energji (inceneratorët) dhe importin e disa lloje mbetjesh. Ndërtimi i inceneratorëve me formulën e partneritetit publik-privat ka nxitur edhe akuza nga ana e opozitës e cila akuzon qeverinë për korrupsion dhe abuzime në koncesionet për menaxhimin dhe ndërtimin e impianteve trajtuese.
Viti 2019 rezulton me më shumë ndotje si pasojë e mbeturinave. Sipas të dhënave sasia e inerteve është rritur nga 5.5 në 7.7 për qind dhe hedhjet jashtë vendgrumbullimeve nga 0.4 për qind në 2.3 për qind.
Në total 24,538 tonë mbetje urbane janë hedhur jashtë landfilleve, çka rezulton të jetë viti me më shumë hedhje jashtë që prej vitit 2016.
Viti i shkuar rezulton po ashtu me totalin më të ulët të mbetjeve të trajtuara që prej vitit 2013, vit kur me anketimet e INSTAT raportoheshin 940 mijë tonë.
Deri në vitin 2018 INSTAT mblidhte të dhënat për menaxhimin e mbetjeve përmes anketës vjetore pranë subjekteve që ushtrojnë veprimtarinë e mbledhjes dhe menaxhimit të mbetjeve, por këtë vit INSTAT ka ndryshuar metodologji duke kryer pyetësorë elektronikë online bashkive.
Dhjetëvjeçarin e fundit Shqipëria ka pasur probleme për sa i përket anës ligjore dhe ngritjes së infrastrukturës menaxhuese të mbetjeve urbane, çështje këto të kërkuar edhe nga Bashkimi Evropian, e cila mbështet fort nxitjen e riciklimit si zgjidhje kryesore për trajtimin e mbetjeve.
Të dhënat e INSTAT tregojnë se prej vitit 2013 në Shqipëri është ulur përqindja e riciklimit nga 24% në 18%, ndërkohë që depozitimet në landfille janë shtuar. / Opinion.al
