Një 32-vjeçar me precedent penal në fushën e narkotikëve dhe që qarkullonte me armë zjarri në kryeqytet është vënë në prangat e policisë. Pas një hetimi trijavor, gjatë operacionit të koduar “Befasia”, u bë e mundur kapja dhe arrestimi në flagrancë i shtetasit K. T., 32 vjeç, banues në Tiranë, person me precedent penal në fushën e shpërndarjes së drogave të forta në doza të vogla.
“Specialistët për Hetimin e Narkotikëve, pas informacioneve të marra në rrugë operative se një shtetas me precedent të mëparshëm penal vijonte të ushtronte aktivitetin kriminal në fushën e narkotikëve, kryesisht në Kombinat dhe në zonën e Tiranës së Re, kanë regjistruar procedimin penal në Prokurorinë e Rrethit Gjyqësor Tiranë”, njofton policia.
Gjatë kontrollit të ushtruar ndaj 32-vjeçarit në zonën e ” Qytetit të nxënësve” ku po qarkullonte me biçikletë në çantën që mbante në dorë, u gjet një armë zjarri pistoletë me silenciator. Gjatë kontrollit në banesën e këtij shtetasi, Policia gjeti dhe sekuestroi edhe një sasi fishekësh luftarak./Opinion.al
