Seanca e sotme e Kuvendit ka nisur me një interpelancë midis deputetit Artur Roshi dhe ministres së Arsimit, Besa Shahini.
Deputeti renditi një sërë problematikash në arsim, duke u ndalur veçanërisht në tekstet e historisë. Sipas tij figura të caktuara historike nuk kanë vendin që i takon në histori ndërsa të tjerë janë aty pa asnjë kontribut.
“Tekstet kanë gabime në historinë e Shqipërisë. Figura të rëndësishme që janë hequr nga regjimi komunist nuk kanë dalë ende në dritë. Ajo kalon në hije rëndësinë e Kongresit të Manastirit. Vlerat e tyre kanë mbetur ende të pluhurosura nga balta e diktaturës së djeshme.
Ministria e Arsimit nuk ka marrëdhënie me autoritetin e hapjes së dosjeve për të reflektuar historinë që ata gjejnë nga puna kërkimore. Ka një emër shkolle që quhet Vasil Shanto. Ai ka zero kontribut për Arsimin, një pijetarë dhe një bixhozxhi. Nga ana tjetër nuk ka asnjë shkollë me emrin e Mit’hat Frashërit.
Askushët vazhdojnë ende të qëndrojnë në portën kryesore të historisë. Vazhdojnë të propozohen emra pa nivel. Studiohet akoma romani i dobët i Dritëro Agollit ” Shkëlqimi dhe rënia e shokut Zylo”.
Diskutimi se Koliqi dhe Camaj kanë qenë agjentë amerikanë, kjo nuk ia ul vlerën punës dhe veprave të tyre. Është antivlera jonë që e ushqyem atë sistemi dhe nuk e heqim nga politikbërje.
Duhet të keni një database të personave që punojnë në shkolla për të shmangur abuzimet. Psikologët e shkollave i keni kot pasi nuk kanë arritur të reagojnë dhe parandalojnë skandale të tilla”, tha Roshi.
Por Shahini tha se figura e Mit’hat Frashërit është trajtuar dhe nuk është lënë anash në librat e historisë. “Kjo nuk qëndron, figura e Mit’hat Frashërit është trajtuar. Nuk është lënë anash si figurë“. /Opinion.al
