Partia Demokratike ka bërë tre propozime urgjente drejtyar qeverisë, lidhur me menaxhimin e situatës së krijuar prej koronavirusit. Ky veprim I PD, vjen pas lajmit se 15 mjekë në spitalin e Fierit kanë hyrë në karantinë për shkak të kontaktit me një paciente të prekur nga kroonavirus, duke I shkaktuar kështu mungesa sistemit.
Ndërkohë pak më herët, përmes një videoje, Ministrja Manastirliu u ka bërë thirrje të gjithë personave të lidhur me sistemin shëndetësor, si farmacistë, laborantë, stomatologë apo studentë të këtyre degëve t’u bashkohen strukturave në përballimin e situatës.
Ndërkohë, përveç ruajtjes së mjekëve, PD kërkon nga qeveria edhe dezinfektimin e rrugëve dhe masa për evitimin e krizës sociale.
DEKLARATË E PARTISË DEMOKRATIKE TË SHQIPËRISË
Pas mjekëve dhe infermierëve të Spitalit të Durrësit dhe Beratit, sot media raporton se edhe mjekë dhe infermierë në Spitalin e Fierit, janë futur në karantinë, për shkak se i kanë shërbyer personave të prekur nga koronavirus pa mjetet e nevojshme mbrojtëse.
Po bëhet 1 javë që kur është konfirmuar rasti i parë me koronavirus, por qeveria nuk ka marrë asnjë masë që të përmbushë kërkesën kryesore për të pajisur me mjetet mbrojtëse të gjithë personelin shëndetësor në vend.
Shqipëria ka personel të kufizuar shëndetësor dhe nuk kemi luksin që ata të futen në karantinë. Nëse kjo ndodh masivisht, bie muri mbrojtës mes qytetarëve dhe virusit të rrezikshëm. Mjekët nuk do të jenë në gjendje të trajtojmë qytetarët e sëmurë.
Akoma nuk është vonë që qeveria t’i japë fund papërgjegjshmërisë me të cilën ka vepruar deri tani më raport me sistemin shëndetësor. Për ta ruajtur atë nga kolapsi, është emergjente pajisja e stafit mjekësor me mjete mbrojtëse.
Kjo nuk është çështje dëshirash. Është detyrim ligjor!
Neni 6 i ligjit nr. 15/2016 “Për parandalimin dhe luftimin e infeksioneve dhe sëmundjeve infektive”, sanksionon detyrimin që Qeveria të marrë masa të përgjithshme për mbrojtjen nga sëmundjet infektive të pu onjësve të shëndetësisë. Ligji detyron sigurimin e mjeteve të mbrojtjes personale të punonjësve të shëndetësisë dhe personave të tjerë të ekspozuar ndaj agjentëve infektues nga kontaminimi, infektimi dhe prekja nga sëmundjet infektive.
Kjo nuk është koha që kryeministri të shfaqë stilin e tij luksoz të jetesës, me dieta ku konsumohen 2 vakte në 8 orë. Janë të paktën 300 mijë shqiptarë që mezi ushqehen 1 herë në ditë dhe me mijëra fëmijë që flenë me barkun bosh për shkak te papërgjegjshmërisë disavjeçare të qeverisë.
Koha nuk pret më! Duke e vlerësuar kohën si mjetin më të mirë, kryeministri dhe qeveria e tij duhet të marrin disa masa të detyrueshme nga ligji.
Mbrojtja e personelit mjekësor me pajisje dhe mjete speciale.
Dezinfektim me shpejtësi në nivel kombëtar për rrugët, mjediset publike dhe ndërtesat jopublike.
Miratimin pa vonesë të paketës social-ekonomike për shmangien e krizës./ Opinion.al
