Presidenti Ilir Meta, gjatë një interviste për televizionin boshnjak “O Kanal”, ka folur në lidhje me “mini-shengenin” midis Shqipërisë, Serbisë, Maqedonisë së Veriut, Malit të Zi dhe Bosnjë-Hercegovinës.
Meta ka thënë se çdo platformë rajonale bashkëpunimi, që është gjithëpërfshirëse, është e mirëpritur. Po ashtu ai ka theksuar se ky bashkëpunim nuk duhet të provokojë debate të panevojshme, duke u përpjekur për të margjinalizuar dikë ose një vend, apo t’i japësh protagonizëm dikujt tjetër.
Pjesë nga intervista
Gazetari:Ka nisur një iniciativë së fundmi për një Mini-Shengen midis Shqipërisë, Serbisë, Maqedonisë së Veriut, Malit të Zi dhe Bosnjë-Hercegovinës. A është kjo një mënyrë për të pasur bashkëpunim më të mirë në rajonin e Ballkanit apo jemi më mirë me marrëveshje të tipit CEFTA? Ka opinione nga më të ndryshmet…
Meta: Ne kemi kaq shumë platforma rajonale bashkëpunimi. Çdo platformë rajonale bashkëpunimi, që është gjithëpërfshirëse, është e mirëpritur. Kjo duhet të ishte një parakusht për të promovuar dhe konsideruar iniciativa rajonale premtuese dhe të dobishme. Iniciativa që ndihmojnë bashkëpunimin tonë janë gjithmonë të mirëpritura, por jo duke provokuar debate të panevojshme, duke u përpjekur për të margjinalizuar dikë ose një vend, apo t’i japësh protagonizëm dikujt tjetër. Vetëm partneriteti dhe gjithëpërfshirja mund të rrisë besimin mes vendeve, mes njerëzve dhe mund të reduktojë dhe eliminojë të gjitha barrierat, qofshin ato legale, administrative apo burokratike në rajonin tonë./ Opinion.al
