Gjatë një interviste për televizionin boshnjak “O Kanal”, Presidenti Ilir Meta, ka folur në lidhje me situatën që po përballet Shqipëria pas tërmetit tragjik të 26 nëntorit, i cili la pas 51 viktima, qindra të plagosur dhe dëme të shumta materiale.
Meta është pyetur nëse i kënaqur nga reagimi i qeverisë pas tërmetit, si edhe i institucioneve të tjera këtu në Shqipëri.
Pas kësaj pyetje, presidenti është përgjigjur duke theksuar se të gjitha institucionet janë angazhuar dhe se tërmeti i 26 nëntorit ka bërë që Shqipëria të shikoj dobësitë e saj.
Gazetari: A jeni i kënaqur nga reagimi i qeverisë suaj këtu në Shqipëri pas tërmetit, si edhe i institucioneve të tjera këtu në Shqipëri?
Presidenti Meta: Të gjitha institucionet janë angazhuar menjëherë të përballen me pasojat dhe ato vazhdojnë të përmirësojnë mekanizmat e përballimit të këtyre pasojave. Shqipëria nuk është goditur nga një tërmet kaq shkatërrues prej një kohe të gjatë, por gjithashtu kemi parë dobësitë tona dhe besoj kemi nxjerrë mësimet e duhura se si t’i përmirësojmë ato në të ardhmen. Ne jemi shumë të kënaqur me reagimin ndërkombëtar. Me reagimin e Kosovës, Maqedonisë Veriore, Serbisë, vendit tuaj, Malit të Zi, Kroacisë dhe vendeve të tjera të rajonit që u përgjigjën menjëherë, erdhën këtu dhe ofruan ekspertizën e tyre.
Gazetari: Ju thatë që llogaritjet janë në proces, llogaritjet e dëmeve, a ka ndonjë shifër se sa para i duhen Shqipërisë për të filluar rikuperimin, të filloni ndërtimin e shtëpive?
Presidenti Meta: Kjo do të vijë pas vlerësimit teknik sepse ne jemi në proces verifikimi, që është ende në vazhdim, dhe ka kategori të ndryshme të dëmeve dhe ndërhyrjeve që janë të nevojshme për rikuperimin e gjithë këtyre pasojave. Sigurisht që ka një dëm të madh, por para së gjithash ata janë të përkushtuar të ndajnë burimet financiare vendase dhe gjithashtu të kërkojnë mbështetjen ndërkombëtare duke qenë se japin vlerësime shumë të besueshme dhe serioze./Opinion.al
