Pasi i kishte qëndruar larg, përplasjes mes Presidentit Ilir Meta dhe faktorit ndërkombëtar, në lidhje me reformën në drejtësi dhe ngritjes së Gjykatës Kushtetuese, kryeministri Edi Rama e ka cilësuar një turp këtë zhvillim.
“Ajo që ai bën ndaj përfaqësuesve të vendeve partnere është jo vetëm e turpshme për të gjithë ne, jo vetëm në kundërshtim më konventat e Vjenës që mbron integritetin fizik dhe dinjitetin e çdo diplomati, është e turpshme dhe për gjithë paraardhësit tanë që kur është shkruar kanuni që thotë se shtëpia e shqiptarit është e Zotit dhe e mikut. Turp, turp, turp. Ne do të jemi në një linjë me SHBA dhe BE, sepse ne e bëjmë këtë për shtet bërjen këtu dhe gjeneratat e tjera. Kjo është rruga e duhur”, tha Rama.
Sa i përket kaosit të Gjykatës Kushtetuese, Rama tha se “Ne kemi qenë 100 % me partnerët tanë. Ata nuk janë në Shqipëri për të qeverisur Shqipërinë, janë në Shqipëri për të përfaqësuar vendet e tyre dhe për të garantuar interesat e tyre strategjike me Shqipërinë”.
Ndërkohë Presidenti i Republikës, Ilir Meta ka vendosur të dalë nga zyra e tij duke nisur një tur takimesh me qytetarët, një iniciativë e panjohur më parë nga një kryetar shteti.
Ishte zëdhënësi i presidentit që zbuloi se takimi i parë do të bëhet në “Ditën e rinisë” në 8 Dhjetor në qytetin studenti. Synimi, sipas zëdhënësit të kreut të shtetit, është nisjen e një dialogu me Shqipërinë për të mbrojtur Kushtetutën dhe demokracinë.
“Nisja e Dialogut të Presidentit Meta me Shqipërinë ka për qëllim mbrojtjen e Demokracisë dhe Kushtetutës! Dialogun e Presidentit Meta me shqiptarët nuk mund ta ndalë askush, deri në zbatimin e detyrimit kushtetues për Referendumet. Jemi të vendosur deri në fund: Demokracinë nuk e japim me koncension! Tani vetëm demokraci direkte! Tani vetëm referendum! Shqipëria e para! Shqiptarët mbi çdo gjë!”./ Opinion.al
