Presidenti Ilir Meta zgjodhi konferencën me homologun nga Maqedonia e Veriut, Stevo Pendarovski, për të dhënë mesazhe mbi situatën politike në vend.
Sipas kreut të shtetit shqiptar pavarësisht pakënaqësisë për mos hapjen e negociatave, e vetmja alternativë e pakokurrueshme për të dy vendet mbetet anëtarësimi në BE.
“Do të forcojmë përpjekjet tona në mënyrë që sa më shpejt të kemi zhvillime pozitive në këtë drejtim. Çdo ide tjetër do të ishte e papranueshme për një rajon që është aq jetik për të ardhmen e vetë kontinentit, dhe aq më tepër që edhe sot është i rrethuar nga vendet e BE”, tha Meta.
Presidenti shtoi se Shqipëria duhet të bëjë më tepër për të fituar besimin e vendeve të unionit që nuk ishin dakord me nisjen e bisedimeve.
“Për sa i takon vendit tonë, jam i sigurt se do të na duhet të bëjmë përpjekje edhe më të mëdha për të qenë edhe më të besueshëm dhe për këtë besoj se platforma më e mirë mbetet ajo e miratuar nga Bundestagu gjerman për të cilët kërkohet konsensus nga të gjitha palët”, u shpreh Presidenti Meta.
Nga ana tjetër, Presidenti i Maqedonisë së Veriut, Stevo Pendarovski, thotë se Maqedonia e Veriut nuk është penalizuar nga Shqipëria për JO-në e negociatave. Ai tha se të dy vendet kanë përparuar njësoj dhe meritonin të merrnin dritën jeshile për këtë hap.
“Procesi i ndarjes së dy shteteve, asnjëherë nuk ka qenë pjesë e fjalotir tim politik, sepse mendoj se dy shtetet duhet t’i fillonin negociatat. Ne harxhuam shumë kohë tek miqtë tanë t’i bindim se nuk bëhet fjalë për anëtarësim të plotë, por vetëm fillim të një procesi që do të vijojë me vite të tëra. Serbia është në vitin e pestë të negociatave, Mali i Zi është në negociata shtatë vite e gjysmë, e nga ky vit nuk i ka hapur ato kapituj jo më t’i mbyllë”, tha Pendarovski./ Opinion.al
