Pak ditë më parë Shqipëria dhe Maqedonia e Veriut dështuan që të merrnin një vendim pozitiv nga Këshilli i Europës për hapjen e negociatave me BE.
Lidhur me këtë çështje ka folur ministrja e Shtetit për Marrëdhëniet me Parlamentin, Elisa Spiropali. Gjatë një interviste televizive, Spiropali ka deklaruar se qeveria ishte e informuar se Këshilli Evropian do të merrte vendim negativ për Shqipërinë dhe Maqedoninë e Veriut, për mos hapjen e negociatave.
“Ishte një mungesë-vendimi, më shumë se një vendim negativ. Një diskutim, që pa diskutim që ne ishim të informuar. Ka kohë që diskutohet në BE strategjia që Këshilli duhet të ndjekë për zgjerim. Nga gjithë këto diskutime, vlen të përmendet mbështetja e jashtëzakonshme që ka marrë Shqipëria, reagimi i DASH, deklaratat e Donald Tusk, qëndrimi i Angela Merkel dhe të gjithë atyre që kanë punuar ngushtësisht me Shqipërinë. Keqardhje që Këshilli nuk arriti të kishte unanimitet”, u shpreh ministrja.
Ministrja ka folur dhe për qëndrimin e presidentit të Francës, Emmanuel Macron, ku theksoi se ai po bëhet një pengës për zgjerimin e BE, ndërsa shtoi se konflikti i tij është me BE dhe jo me Shqipërinë.
“Një president francez që ka vizionin e tij për zgjerimin, i cili është kthyer në një pengesë të vërtetë në raport me vijimin e procesit të zgjerimit në BE. Ai nuk ka një problem me Shqipërinë apo Maqedoninë e Veriut, por një problem me BE dhe deklaratat e ashpra tregojnë për një konflikt të madh brenda vendeve anëtare. Pritet që Franca dhe Macron të paraqesë vizionin e tij mbi BE dhe si të bëhet e mundur përfshirja e këtyre vendeve. Ajo për të cilën vërtet të vjen keq janë deklaratat e papërgjegjshme të disa deklaratave të shqiptarëve, përfaqësuesve politikë, që duket sikur mezi kanë pritur që Shqipërisë t’i jepet një “JO”. Pra në një krah kemi Presidentin e KE, Tusk, që thotë se faji nuk është i Shqipërisë dhe Maqedonisë së Veriut dhe se këto vende i kanë bërë detyrat, dhe nga ana tjetër, politikanë si Basha, Berisha, Kryemadhi, etj, të cilët gati publikisht falënderojnë Macron. Nëse presidenti i Francës mund të kuptohet për qëndrimin e tij, nuk kuptohet se pse këta individë që janë përfaqësues të popullit shqiptar, janë në një mendje me të”, tha Spiropali./ Opinion.al E.Xh.
