Deputeti Kujtim Gjuzi është bërë sërish protagonist në nisje të seancës së sotme plenare. I veshur, me xhinse, këmishë dhe një xhaketë sportive, ai është “përplasur” me kreun e Kuvendit, Gramoz Ruçi për të drejtën e fjalës. Gjuzi i kërkoi atij të mos e ndalojë të bëjë replikë me kryeministrin Rama duke ju referuar rregullores.
“Me ça të drejte shkelni nenin 49 dhe 50 të rregullores së sapo miratuar dhe nuk lejoni replikë me kryeministrin. I nderuar kryetar dhe nëse unë të drejtohem i nderuar, të drejtohem se je kryetar i Kuvendit. E them se kam një konsideratë për atë që ju thoni si kryetar kuvendi. Kurrsesi nuk mund të jem dakord me ju që nuk më lejoni të bëj replikë. Tani çfarë duhet t’ju them, mos duhet na një mocion mosbesimi, ne nuk i kemi votat të të shkarkojmë ty se dhe me dash ne, kemi 28 mandate këtu dhe e mban vendin me dhunë. Kushdo që të jetë nëse kemi replikë duhet të na lesh. Mos vendos sikurse deshe ti heqësh njëherë Dolo ballistit lopën në Memaliaj dhe ai s’të la. E në fakt kërkon ballkonin e lopëve në Rroskovec. Kujdes zoti kryetar”, tha Gjuzi.
I menjëhershëm ka qenë reagimi i Gramoz Ruçit cili i kërkoi Gjuzit tre gjëra. Një ndër to ishte që herë tjetër të jetë i veshur sipas rregullores së Kuvendit.
“Kujdes Zoti Gjuzi, kur të flasësh në emër të rregullores. E dyta të flasësh me etikë dhe e treta herë tjetër në Kuvend të jesh i veshur sipas rregullores së Kuvendit”, tha Ruçi. /Opinion.al
